Arnat ukiup ataatsip qaammatillu arfinillit matuma siornatigut Mikael Petersenimik unnerluussisimasut kiisami matu matoriarlugu siumut isigisinnaaqqilerput. Arnat marluk sisamanngormat eqqartuussisoqareersoq Sermitisaq.AG-mit attavigineqarsimasut taamatut qisiuarput.

- Suliamut matumunnga qasunaqisumut, ilungersunaqisumut ingasaqisumullu naggammik malinnaavunga. Nunatta Eqqartuussiviata pineqaatissiissut annikillisikkaluarpaa, pineqaatissiissulli pineqaatissiissutaavoq, arnat sisamat Mikael Petersenimik unnerluussisimasut taakku ilaat ataaseq, Mari Laursen Facebookimigut allappoq.

Nunatta Eqqartuussiviata, najukkami eqqartuussiviup Mikael Peterseni februaarip qaammataani pissutsini sisamani pisuussuteqartutut ulluni 60-ini pineqaatissinneqarsimasunut inissiisarfimmiittussanngorlugu alajangiiffigisaa sakkukillillugu, ilaannakortumik pisuussuteqartutut aalajangiiffigivaa. 

Kisimiittoqassanngittoq

Mari Laursenip Sermitsiaq.AG-mut itisilerlugu oqaatigaa, suliami inerniliunneqarttoq suliallu naammasineqarnera qullililluni nuannaarutigisimallugu.

- Pissutsit ajornaatsut, soorlu inoqatinik pingaartitsineq, ataqqinninneq aamma angutaagaluaraanni arnaagaluaraanniluunniit naleqartinneqarnissaq nalinginnaasumik atorneqartarnissaat aamma sumiluunniit sulliffeqaraluaraanni qanorluunniillu atorfeqaraluaranni takutinneqartarnissaat ullormut eqqaasissutissatsialaapput, taanna oqaluttuarpoq.

Arnat sisamat taakku ilaat ataaseq Siumut sinnerlugu folketingimi ilaasortaasoq tassaavoq Aki-Mathilda Høegh-Dam. Taassuma aamma suliap naammassineqarnera oqiliallaatiginerarpaa.

-Arnat quliulluta aallartikkaata toqqissisimanarnerusumik suliffeqarnissarput aqutsisunut piumasaraarput, pissutsillu allanngorareersut Mikael Petersen Nunatta Eqqartuussivianit pineqaatissinneqarpoq, taanna Sermitsiaq.AG-mut oqarpoq.

- Ilumoortoq saqqummiunneqarpoq, pingaarnerpaasorlu tassaavoq nikassarneqaqqissagutta innarlerneqaqqissaguttaluunniit kisimeeqquttussaannginnerput, taanna oqarpoq.

Nipangiunneqanngisaannassasoq

Aki-Matildap arnanut allanut kaammattuutigaa, killissatik qaangerlugit arlaannik misigisaqassasunik unitsitsisarnissaannik.

- Taamatut pineqarsimaneq kisimiilluni ilormiorineqanngisaannassaaq. Toqqissisimaffigisatit oqaloqatigikkit imaluunniit pisimasoq nipituuliutigiuk, taanna kaammattuivoq.

Aki-Matilda Høegh-Dam aamma Mari Laursen misigisimapput, suliami matumani pissaaneqarnerusumut akiuiniarsimallutik.

- Inuit ilinnut upperinninngitsut imaluunniit nipangersaaniarsarisut nakkaannarfiginngisaannakkit. Inummilluunniit pissaanilimmit sallutunerartinneqaraluaruit, inullu pineqartoq siusinnerusukkut Naalakkersuisunut siulittaasuusimagaluarpalluunniit ilumoortoq illit nalunngilat, ilumoortorlu taamaalluni saqqummissaqqaarpoq.

Mari Laursen Facebookimi ilanngullugu allappoq:

- Inuttut nammineq naatsorsuutigisimaluarpara, kammalaatersortoqarneratigut maanga killinnissarput ajornassasoq. Nipangersarneqassalluta (…) Nipangiinnarluta akuersaartinneqassalluta naatsorsuutigisimagaluarpara. Tamannami nalinginnaasuuvoq, ilaa?