Skip to main content

Mikael Petersen pineqaatissiissummut pakatsisoq

Mikael Petersen suli pinngitsuunerarpoq, naak Sermersuup Eqqartuussiviata arnanut sisamanut, Siumup allattoqarfianiittarsimasunut, kannguttaatsuliorsimasutut pisunut sisamanut unnerluunneqarneranut pisuutikkaluaraa. Suliaq Nunatta Eqqartuussivianut suliassanngortillugu ingerlateqqippaa.

Siumumi allattaanerusimasoq Mikael Petersen ulluni 60-ini pineqaatissinneqarsimasunut inissiisarfimmiittussanngorlugu sisamanngormat eqqartuunneqarpoq. Kannguttaatsuliorsimanernut assigiinngitsunut sisamanut eqqartuunneqarpoq. Mikael Petersenilli pineqaatissiissut nunatta eqqartuussivianut erngerluni suliassanngortippaa.

- Taama inerniliisoqarnera aliasuutingaara. Soorlu eqqartuussissuserisuma kissaataatulli pinngitsuutinneqarnissara neriuutigisimagaluarpara, Mikael Petersen Sermitsiaq.AG-mut oqarpoq.

Eqqartuussisoq Pia Hjort Andersen eqqartuussivimmi aalajangernermi tunngavilersuutinut ilaatippaa ilisimannittut nassuiaataat uppernassuseqarluarnerat.

Eqqartuussiviimmiit ilalerneqanngilaq

Mikael Petersenip illersuisuata eqqartuussinerup naammassilernerani naggataasumik oqaaseqarami ilisimannittut uppernassuseqannginnerat taavaa. Taamaattorli unnerluussut politikkimi sulinermit tunngaveqartuunerarlugu, Kim Kielsenip partiimi siuttutut uppisinneqarnissaanik anguniagaqartuunerarlugu.

Pinerlineqarsimasulli nassuiaanerat eqqartuussiviup maanna uppernassuseqartutut inerniliuppai, ataqatigiittumillu oqaluttuarineqarneri aamma ilalerlugit. Mikael Petersenip partiimi pingaaruteqartutut inissisimasuunera aallaavigalugu kannguttaatsuliornerit sakkortulluinnartutut isigalugit.

- Eqqunngitsuliorfigineqartutut misigivunga. Isumaqarpunga iliuuserisimanngisannulluunniit pineqaatissinneqarlunga. Eqqartuussiviup unnerluussisussaatitaasup inaarutaasumik oqaaseqaatai kisiisa eqqortutut tiguai. Isumaqanngilanga suliaq naammaginartumik suliarineqartoq, taamaammat nunatta eqqartuussivianut suliassanngortitseqqiivunga, Mikael Petersen oqarpoq.

Qiimmassaaniarluni nulukkut pattalaarisarunnaassaaq

Mikael Petersen iviagikkut nulukkullu attualaarisimasutut, kinguaassiuutinut tunngasunik kannguttaatsumik oqaluffiginnittarsimasutullu pineqaatissinneqarpoq. Mikael Petersenip pissusilersuutigisimasani kannguttaatsuliornertut arneriffiginninniarnertulluunniit pissusilersuutaasimanngitsut pisumi aalajangiusimajuarsimavaa. 

Paasisinnaaviuk pissusilersuutigisat arnanit illit paasinninnernit allatorluinnaq paasineqartarsinnaammat?

- Aap tamanna paasilluarpara, pisummi assigiinngitsumik paasisarpagut. Kalaallit Nunaanni kultoori qanga allaanerungaarsimavoq. Pissutsit allarluinnaat atuutilersimapput, tamanna aamma paasineqartariaqarpoq.

Isumaqarpit suliaq una pissutsit nutaanngorsimanerannik takutitsisuusoq?

- Aap taama isumaqarpunga. MeToo nunarsuarmi atungaangaatsiarpoq, aamma Kalaallit Nunaanni, Mikeal Petersen oqarpoq.

Ilisimannittutut eqqartuussivimmi sassartinneqartuni katillugit 13-iusuni, ilaatigut Doris J. Jensen, Vivian Motzfeldt, Karl Kristian Kruse, Jens Immanuelsen, Bent Møller, Miki Jensen aamma Ineqi Kielsen peqataapput. 

- Nunatta eqqartuussiviani unnerluussut suliarineqalerpat qanoq illersorsinnaanersunga pillugu oqaloqatigiissaagut. Pinngitsuunera allanngornavianngilaq, ilisimannittulli amerlanerusut sassaqqujumaarpagut, Mikael Petersen naggasiivoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER