Mikael Petersen partiimi allami suliffittaartoq
Partii Naleqqap Siumumi allattaasimasoq Mikael Petersen partiip allaffeqarfianik aqutsisussatut atorfinitsissimavaa.Mikael Petersen qaammatialunnguit matuma siorna arnanit qulinit kinguaassiuutitigut innimiilliorsimasutut unnerluutigineqarpoq, Siumumit anineranik kinguneqartumik.
Siulersuisut Inatsisartunilu gruppi isumaqatigiillutik Mikael Petersenip Partii Naleqqami allatsitut atorfinitsinneqarnissaanik inassuteqaat akuerisimavaat. Partii pingasunngormat tusagassiorfinnut nalunaaruteqarnermi allappoq.
- Mikaeli 2020-mi apriilip aallaqqaataani sulilissaaq, siunissamilu suleqatigiinnissarput qilanaaraarput, partii allappoq.
Mikael Petersen Siumulu suleqatigiikkunnaarput, arnat qulit Mikael Petersen utikattumik kinguaassiuutitigut innimiilliortarsimanerarlugu unnerluussillutik saqqummermata.
Pisimasorli taanna atorfinitsitsinermut atatillugu Parti Naleqqamit oqaaseqarfigineqarusunngilaq.
- Inummik pillagaasimasutut uppernarsaatilimmik atorfinitsitsinngilagut, Pele Broberg Sermitsiaq.AG-mut unnerluutigisat apeqqutigingatsigit oqarpoq.
- Siumut iluani pisut isummerfigissanngilagut. Kinguaassiuutitigut innimiilliorsimanerit oqaaseqarfigissanngilagut. Partiimi kinguaassiuutitigut innimiilliortarnermut tunngatillugu erseqqissunik malittarisassaqarpugut, naatsorsuutigaarpullu tamarmik malittarisassanik malinnissasut.
Arnat unnerluussutaannut isummerusunngitsoq
Kisiannimi angummik kinguaassiuutitigut innimiilliorsimasutut unnerluutigineqarsimasumik atorfinitsitsineq takutitsinerlunnerunngila?
- Politiinut unnerluutigineqarsimatinnagu, ilumoortuunersoq isummerfigisinnaanngilarput.
Isumaqarpisi, arnat taakku qulit saqqummersimasut sallusut?
- Siumumi susoqarnersoq isummerfiginianngilarput, aamma pissaaneqarniunnermi tamakku atortarneraat isummerfiginianngilarput. Taamatut saqqummiussissagaanni ingerlaqqittoqartariaqarpoq. Innarliisoqarsimappat politiinut nalunaarutigineqassaaq, Pele Broberg oqarpoq.
Innarliineq politiinut nalunaarutigineqassaguni, immikkut ittumik sakkortussusseqartariaqarpoq, paragraffimut kannguttaalliorfiginninnermut pinngitsaaliinermullu attuumassuteqartumut atatissinnaanngorlugu. Kalaallit Nunaanni Politiit naapertorlugit, kinguaassiuutitigut innimiilliornerit sulisut peqatigiiffiini sulisitsisut sulisullu aaqqiagiinngissutaannik eqqartuussivilersuinertut ingerlanneqarnerusartut.
Mikael Petsersenimut unnerluussutaasut ilagaat, arnanik kinguaassiuutimigut atttuuaqqusisarsimanera, nuluisigut pattalaarinnittarsimanera aamma suleqatimi saaavanni atoqatigiinnissamik kaammattuisarsimanera.
Partii Naleqqami kinguaassiuutitigut innimiilliortoqartanngitsoq
Mikael Petersenip unnerluussutigineqartut tamaasa aallaqqaammut itigartikkaluarpai, kingusinnerusukkulli danskit aviisianut Ekstra Blademut nassuerutigaa, ataaseq nuluisigut pattalaarsimallugu, immaqalu killissaminik qaangiisimalluni, kinguaassiuutitigulli innmiilliornissaq siunertarinngisaannarsimallugu.
Pele Brobergip erseqqissaatigaa, Partii Naleqqami kinguaassiuutitigut innimiilliortarnermut tunngatillugu qulartoqanngitsoq.
- Siumumi pisimasut aallaqqaammuulli misissorsimavavut, suullu erseqqissaassutigineqassanersut aaqqiiffigisimallugu, partiitsinni sulisutta tamarmik toqqissisimanissaat anguniarlugu, Pele Broberg oqarpoq.
Mikael Petersen partiimi ulluinnarni allaffissornermik aqutsinissamut naapertuulluarpoq, Pele Brober oqarpoq.
- Politikkikkut ingerlatsinermi ukiorpassuarni misilittagaqarpoq, aamma partiimik siuarsaaqataasinnaavoq. Aamma sineriammi inissisimanitsinnik nukittorsaaqataasinnaavoq, Pele Broberg naggasiivoq.
Mikael Petersen 80-ikkut aallartinneranni Siumumi sulilluni aallartippoq.