Mikael Petersen nutaamik periarfissinneqaqqittoq
Mikael Petersenip kannguttaatsuliortarsimasutut Sermersuup Eqqartuussivianit januaarip qaammataani pinerluuteqarsimasunut inissiisarfimmiittussanngortinneqarluni eqqartuunneqarsimanerminik suliareqqitassanngortitsinera ullumi suliarineqassaaq.
Partiip Siumup allatsigisimasaata Mikael Petersenip arnanut sisamanut partiimut attuumassuteqartunut kannguttaatsuliortarsimasutut unnerluunneqarsimanera pillug suliaq Nunatta Eqqartuussivianit ullut pingasut tulliuttut suliareqqinneqassaaq.
Januaarip 14-iani pissutsini sisamani tamani pisuutinneqarluni eqqartuunneqarpoq, Mikale Petersenillu suliaq ingerlaannartumik suliareqqitassanngortissimavaa.
Dommerip Pia Hjort Andersenip pineqaatissiinermini pingaartissimavaa, Mikael Petersenip partiimi nuimasuullunilu pissaaneqarnera, taamaammallu arnat pineqartut kannguttaatsuliorfigineqaraangamik akerliliiniarnissamik ajornartorsiuteqartarsimanerat.
- Suliap suliarineqarnerani erseqqissaassutigineqarpoq, Mikael Petersenip oqaasiisa malinneqartussaanerat kikkunnit tamanit ilisimaneqartoq. Partiimi pissaaneqarsimaqaaq, Mikael Petersenillu pingaartumik allaffimmi arnanut tiinganiarpaluttumik nipeqarluni oqaluttarsimanera tamanit ilisimaneqarluni, dommeri pineqaatissiinermit taamatut oqarsimavoq.
Suliarlu maanna Nunatta Eqqartuussiviani suliarineqartussanngorpoq, ulluni pingasuni eqqartussisoqartussanngorlugu pilersaarutigineqarluni. Suliami sisamanngorpat aalajangiisoqarnissaa naatsorsuutigineqarpoq.
Mikael Petersenip pinngitsuunerarnini aalajangiussimajuarpaa.
