Mikael Petersen kinguaassiuutitigut innimiilliorsimanerangaanerminut akerliliisoq

Mikael Petersenip ”Unnerluutigineqartut isertuussat tusatsiakkat tunngavissaqanngitsut” qulequtsiullugu tusagassiorfinnut nalunaarummini, Sermitsiaq.AG-mut nassiussimasamini erseqqissaatigaa, eqqartuussinikkut inissisimanerata misissuiffiginerata takutikkaa, ”ernumanartoqanngitsoq, kiisalu politiinut unnerluutigineqaranilu pisortatigoortumik unnerluutineqarsimanani”.

Arnat qulit unnerluussutitik Siumut siulersuisuinut februaarip qaammataani nassiuppaat, siulersuit Mikael Petersen suliunnaarallartippaat, unnerluutigineqartulli Mikael Petersenimut saqqummiunnagit. Sermitsiaq.AG-p arnat taakku qulit unnerluussutaat pissarsiarisimavai, Mikael Petersenimullu unnerluussutigineqartorpassuit ilaat saqqummiussimallugit.

Oqaaserineqartartut nangaanani annissorneqartartut

- Uannut unnerluutiginnittoqanngisaannarpoq. Pisortarisarsimasakka aamma tamatuminnga
paasitittarnikuunngilaanga. Siumumi siusinnerusukkut oqaaserineqartartut nangaanani
annissorneqapallaannartarput, uangalu tassani partiimi allattaanertut inissisimaninni illuatungilerlugit pisussaafeqarsimagaluarlunga peqataaffigisimavakka. Taamaattoq pinaasersumut arneriniarnertut taassallugit ingasagivara aammalu ilisarisinnaanngilluinnarlugu. Inatsisilerituut aamma tamatumani
isumaqataapput, Mikael Petersen tusagassiorfinnut nalunaaruteqarnermi oqarpoq.

Mikael Petersenip ilisimatitsissutigaa, ataasiarluni pisimasumi, kammalaatitut
qiimmassimaarpallaarluni imatut pissuseqarnikuulluni, suleqatigisimasap killissai qaangertoorsimasinnaallugit. Tamanna kukkunikkut isumaqartinneqarsimavoq Petersen-ip unnerluutigineqartut eqqortuutikkai.

- Ugguarersuaarpara, sissuernerusimannginnama, kammalaatit akornanni oqaasiliarisarsimasakka aammalu suleqatit akornatsinni pissusilersuutivut qanutut paasineqartariaqarsimanersut, aamma ilumoorlunga ajuusaarutigaara, arlaata misigissusaat qaninaarpallaartarsimagukkit. Illuatungaani kisianni aamma paasisinnaanngilara, isertuussillutik naammagittaalliortut, pisortatigoortumik
unnerluutiginnittarsimanngimmata sulisitsisorisarsimasakkalu qisuariartarsimanatik, tamannalu tunngavigalugu massakkut suliffigisanni sooq atornerlunneqassappat tatigisaanngittutut isikkoqalersinniarsaralunga. Aamma allaanngilaq piaaralutik paatsuunganartinniarsarigaannga, unneqqarissumik nassuerama, inuttut pissuserisartagara paatsuunganernik misigissutsinillu ajuallatitsinermik kinguneqarsimassappata, Mikael Petersen oqarpoq.

Inatsisilerituut misissuisimasut

Partii Naleqqami allatsitut atorfinitsinneqarnermingut atatillugu kissaatigisimavaa, pisuutitaajunnaarsinneqarnissani aammalu sulisitsisorilikkami nutaat pinngitsuulluni qulakkeertikkusussimallugu. Tamanna pillugu inatsisilerituut advokathuset
Koch/Christensen inatsisitigut suliaqaqqusimavai.

- Inatsisilerituut inerniliinerat ataasiuvoq. Pisumi uannut pillagaassutaasinnaasunik imaluunniit soraarsitsinermik kinguneqartussamik nassaarsinnaasimanngillat. Taamaattoq soorunami taamatut annertutigisumik suleqatigisimasannut sulisitsisortaannullu uivertoqartoq ajuusaarutigaara. Tamanna pillugu tapersersuinerat qujamasuutigeqaara. Maani toqqissimasumik pissuserissaartumillu imminnut oqaloqatigeeriaaseqartoq pisortaasunit isumagineqartoq tamakkiisumik tapersersorpara, qulakkeerumallugulu, pissuserisartagaralu maani suliffittaanni killigititaasunut qanillinavianngitsoq neriorsuutigalugu, Mikael Petersen nalunaarummini neriorsuivoq.

Partii Naleraq ilisimatinneqarsimasoq

Mikael Petersen naggasiilluni ilisimatitsivoq annertunerusumik oqaasissaqarani, ”ilumoornerarluguli sulisitsisortaavisa inatsisilerituut inerniliinerat tusaatissatut tigusimagaat”.

Kinguaassiuutitigut innimiilliorsimaneq pillugu ilanngutassiat tamaasa uani takukkit.