Neriniartarfiup Koksip Michelinimit nersorneqarsimanini attatiinnarpaa. Michelinip ulloriai piumaneqartut Norgemi illoqarfimmi Stavangerimi aaqqissuussisoqarnerani nersornaasiunneqarmata tamanna paasinarsivoq.

Ullorissat agguaanneqarmata sulisut igaffimmilu pisortaq Stavangerimi peqataanngillat. Igaffimmi pisortap Poul Andrias Ziskap oqarnera naapertorlugu - timmisartumik angallannerit piffissami matumani pissusissamisuunngitsumik ingerlanerannik tamanna pissuteqarpoq. Tamanna nalaakkusussimanngilaat. Kisianni nalliuttorsiutigineqarsimavoq.

- Sulisut ataatsimiinneranni champagnemik puiaasamik ammaavugut kasuullutalu. Taamaaleriarluta sulinitsinnut uteqqiinnarpugut, igaffimmi pisortaq naammagisimaarinnittoq taama nassuiaavoq.

Neriniartarfiit assigiinngilluinnartut

Neriniartarfik Michelinimit nersornaatinik marlunnik attassisoq, Savalimmiunit Ilulissat kujataanut Ilimanamut nuukkallarneqarnikuuvoq.

Neriniartarfiullu Savalimmiuniikkunnaarluni Kalaallit Nunaannut nuunnikuunera, ataatsimut isigalugu inissisimaneranut nerisassanillu misigisaqarfiuneranut sunniuteqarpoq.

Poul Andrias Ziska nassuiaavoq.

Tamanna Michelinip nersornaasiinermini naliliineranut sunniuteqarsimanersoq ilisimanngilaa. Koksilu Michelinimeersumit Kalaallit Nunaanni tikeraarneqarsimanersoq, igaffimmi pisortap aamma ilisimanngilaa.

- Taakku (Michelinimit ilitsersuisartut, aaqq.) alakkarsimassasut takorloorneqarsinnaavoq. Kisianni Savalimmiut Kalaallit Nunaallu danskit kunngeqarfiannut ilaammata – illoqarfinnguamit illoqarfinnguamut allamut nuussimasugut eqqarsaannarsimasinnaapput – tamannalu annerusumik sunniuteqartinneqarnani, Poul Andrias Ziska oqarpoq.

Kalaalimernit pingaartinneqarnerusut

Koks nutaamik Kalaallit Nunaanni suliaqalersimasoq, Michelinip ilitsersuutaani allanneqarsimavoq. Tamannalu annerusumik Michelinip ilitsersuutaani sammineqannginnera, igaffimmi pisortap uggoraa.

- Naak inuit taakku periuserlu taanna pineqaraluartoq, neriniartarfiit assigiinngilluinnartut pineqarput. Kalaaliminernik suliaqarpugut, Savalimmiormiut nerisassaataat atornagit, taanna oqarpoq:

- Misigisassanut tamanna annertuumik sunniuteqarpoq, tamannalu ersarinnerusumik sammisinnaagaluarpaat.

Tamannali oqaatigereerlugu, Koksip Michelinip ulloriai marluk tigummiinnarneqarnerat igaffimmi pisortap nuannaarutigaa.