Michael Rosing politikkimit tunuassaaq
Illoqarfiit pingaarnersaata kommuniani attaviitsoq, Micheal Rosing, apriilip arfernanni kommunimut qinersisoqarnissaanut qinigassanngortinniarani aalajangerpoq. Inatsisartunut qinersinermut aamma qinigassanngortinnianngilaq.
Qinersinissanut tulliuttunut qinigassanngortinnissaq taamaatippoq, Inatsisartunut imaluunniit kommuninut qinersinernut, Michael Rosing taama ilisimatitsivoq, taanna Suleqatigiissitsisunik pilersitseqataavoq, tassanngaanniillu siorna perulluliornikkut tunuartinneqarpoq.
Aalajangernerata nammineerluni rekortiminik qaangiinnginnissaminik aporfeqartitsisoq qungujulluni oqaluttuarpoq, tassa kommunalbestyrelsimut imaluunniit Inatsisartunut toqqaannartumik qinigaanani ilaasortanngortarnini qaangerusunnginnamiuk. Illuanik nuna tamakkerlugu politikkimi kommuninilu sinniisutut sunniuteqartarsimavoq.
Suleqatigiissitsisut siunissaat
Politikkimit tunuarnissamik aalajangerneq qangali pisimasoq, Michael Rosing ilisimatitsivoq, Tillie Martinussenillu partiip aningaasaataanik atuinera pillugu tusagassiorfinni saqqummernera sioqqullugu aalajangersimalluni.
- Partiimi torersaasoqarnissaa siunertaraara, aammalu partiimi susoqarnera qinersisartunut paasitikkumallugu. Suleqatigiissitsisullu nunatsinni politikkimi siunissaqassanersut qinersisartut maanna aalajangerumaarpaat, Michael Rosing oqarpoq, taanna maannakkut Pinngortitaleriffimmi paasissutissanut tunngasuni siunnersortitut sulivoq.
- Partiip aningaasaataanik nutsernermut tunngatillugu atornerluineq pillugu politiinut nalunaarutigineqarnikuuvoq. Politiit utaqqisariaqarpagut, eqqartuussisoqarnissaanullu tunngavissaqarnersoq paasillugu, Michael Rosing oqarpoq, Suleqatigiissitsisunilu pisoq ilungersunartoq tununniarlugu aalajangersimavoq.
Ataatsimiititaliami suli siulittaasuusoq
Apriilip arfernanni kommuninut qinersisoqarnissaata tungaanut Kommuneqarfik Sermersuumi Meeqqanut Atuarfinnullu Ataatsimiititaliami siulittaasuugallassaaq.
Suleqatigiissitsisuneersoq Tillie Martinussen qinersisoqannginnerani Inatsisartunit tunuarniarluni aalajangissappat, soorunami sinniisitut atuutilerumaarluni ilisimatitsissutigaa.
- Kisianni tamanna ilimanarpallaanngilaq, tamatuma pinissaa upperivallaanngilara, taanna naqissusiivoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...