D-ini akerleriinneq
Michael Rosing isumaqarpoq Demokraatit naleqartitaminik sumiginnaasoq
Suliat arlallit pillugit Michael Rosing Demokraatiniit ilaasortaajunnaarpoq. Partiimillu pilersitseqataassanerluni massakkut eqqarsaatigaa.
Maajip qaammataa naalersoq Demokraatit akerleriikkunnaarput. Upernaakkummi Michael Rosing Inatsisartuni gruppimi suleqatigiumaneqarunnaarsimangaluarpoq, iluminnilu akerleriinnerit aaqqiivigineqarsimasut, taassuma partiillu siulittaasuata Randi Vestergaard Evaldsenip naqissuserpaat.
Inuttullu aaqqiagiinngissutit illuartinneqaraluartut, Michael Rosing politikkikkut aalajangiuffigineqarsimasunut arlalinnut isumaqataanngittuarsimavoq.
- Upernaaq akerleriinnerup nalaani uniinnarnissara eqqarsaatigisarsimavara. Kamannermalu nalaani unikkusussimanngilanga, Michael Rosing Sermitsiaq.AG-mut oqarpoq.
Eqqarsarneq
Taanna aasaanerani eqqarsimavoq, ukiuni arlalinni partii ilaasortaaffigisimasani ilaasortaaffigiinnarsinnaanerlugu.
- Maluginiarsimavara, aaqqiisoqarsinnaanissaalu upperisinnaanngilara.
Michael Rosingip tunuarluni nalunaarummini raajartassiissutit agguaanneqartarneri, Tasiilamut immikkut aningaasaliissuteqarnissamut siunnersuut Ilanngaassivimmullu tapersiineq eqqaavai, tassani Demokraatit naleqartitaminnik sumiginnaanerpai.
- Maajip qaammataani isumaqatigiilerassi quleqquttat taakkua eqqaavigit?
- Aap naamilu. Isumaqarluinnarpunga isumaga annissimallugu.
Partiimik nutaamik eqqarsartoq
Michael Rosing Inatsisartuni attaviitsutut ingerlaannarallassaaq. Politikkikkullu siunissami qanoq ikkumaarnera suli aalajangersimanngilaa.
- Partiimik pilersitseqataarusunnginnersunga arlallit aperisimavaannga. Tamannalu eqqarsaatigilluinnarpara. Massakkullu oqaatigisinnaanngilara ilumut taamaaliussanerlunga. Qaammat ataaseq eqqarsaatigilluaqqaassavara.
Michael Rosingip Kattusseqatigiit tunuliaqutaralugit attaviitsutulluunniit qinigassanngortinnissani tunuarsimaarfiginngilaa.
DEMOKRAATINI AKERLERIINNEQ PILLUGU ALLAASERISAT ATUAKKIT:
Michael Rosing: Sulinera atorneqarsinnaasimanngimmat ajuusaarnarpoq
Randi V. Evaldsen: Isumaqarpunga Demokraatit nukittuujulluta
Marlunnik qinigaaffeqarneq Demokraatit aaqqiagiinngissutigaat
Randi: Marlunnik qinigaaffeqarneq ajornartorsiutaanngilaq
Politikkikkut oqaaseqartartoq: Demokraatit ajutoornerat assut ajornartorsiutaasoq
Demokraatini ilaasortaajunnaartoqaqqilersoq
Randi: Michaeli gruppimi peqataajunnaarsimavoq