Sulorarneq
Michael Kleist sulorartartut kattuffianni siulittaasutut qinigaaqqittoq
Sulorartartut kattuffiata immikkut ittumik sinniisunik ataatsimiititsinera sapaatip-akunnerata naanerani pivoq
Badminton Kalaallit Nunaata siulittaasuat Michael Kleist sapaatip-akunnerata naanerani siulittaasutut qinigaaqqippoq.
Kattuffik sapaatip-akunnerata naanerani sinniisunik aallartitanik ataatsimiititsivoq. Taanna taasinermi unammillerteqanngilaq, ukiunilu marlunni tulliuttuni siulittaasutut ingerlaqqissaaq.
Esaias Petersen Paamiuneersoq siulersuisunut qinigaaqqippoq, siulersuisunilu inissaq ataaseq inuttaqanngitsoq Søren Brønlundimut Kangaatsiameersumut tunniunneqarpoq, taanna ataatsimeeqqinnissap tungaanut toqqagaavoq.
Pitsanngoriarnissamut inissaqartoq
Timersoqatigiit Kattuffianni (GIF) generalsekretæri Carsten Olsen ataatsimiinnermut peqataavoq.
Kattuffik oqaloqatigiinnissap ingerlanneqarnissaanut aamma peqataasut eqimattanut agguarneqarnissaannut ikiuuttussatut qaaqquneqarpoq, tassani sulorartartut kattuffiat ullumikkut qanoq inissisimanersoq oqaluuserineqarpoq.
Misissueqqissaarnerup takutippaa, kattuffik ajunngitsumik ingerlasoq, kisiannili suli pitsanngoriarfissaqartoq.
Ilaasortat ikiliartortut
- Aaqqissuussaaneq, aningaasaqarneq aamma aqutsineq ingerlalluarneqarput, kiisalu GIF-imut allanullu kattuffinnut attaveqarneq ajunngilaq.
- Iliuuseqarfigineqartariaqartut tassaapput ilaasortat amerlassusaat aamma kattuffiit timersoqatigiiffiillu akornanni attaveqaqatigiinneq, Michael Kleist allappoq.
Ukiuni kingullerni ilaasortat ikiliartorsimapput, tamannalu siulersuisut maluginiarpaat. Ingammik niviarsiaqqat arnallu amigaataapput, U17-ini aamma U19-ini ikiliartortoqarpoq.
Nunani tamalaani tusaamasaq
Siunnersuuterpassuit akornanni siunnersuutigineqarpoq, kattuffiup nunarsuarmi pitsaanerpaat qulingattut inissisimasoq aamma OL-imi arnani pissartanngortoq, Carolina Marin, Spaniameersoq Nunatsinnut tikeraartinneqassasoq.