Skip to main content

Mianersoqqussut: Raajanik pisaqarluartarneq oqaluttuaannanngoratarsinnaavoq

Raajat uutat qalipaajakkallu akiisa appariarnerat Polar Seafoodimit ernumagineqarpoq. Akiisa apparnerannut landskarsimut eqquisinnaasoq ilaatigut ernummatigineqarpoq

Raajat uutat qalipaajakkallu akii apriilimit 10 procentimik appariarput, raajat qalipallit kilomut koruuninik tallimanik appariaateqarlutik.

- Akit appariarnerat uippalliutiginngilarput, taamaattoq soorunami ernumanartoqarpoq. Inuiaqatigiinnummi eqquisinnaavoq, Polar Seafoodimi siulersuisunut siulittaasoq Henrik Leth Sermitsiaq.AG-mut oqarpoq.

Pisaqarluartarneq

Raajat akii ukiuni kingullerni qaffasipput, tamannali allanngulerunarpoq.

- Ruslandimut tunisaqaaluppugut, Ruslandimili nammineerlutik raajanik aalisarusunnerupput. Canadarmiut Ruslandimit mattunneqareernermi kingorna Kinamut europamullu tunisinerusalerput, taakkunani uagut tunisaqarluartuusarpugut, Henrik Leth nassuiaavoq.

- Kinamut tunisaqarujussuartarnera akinut sunniuteqanngitsoornavianngilaq, oqarpoq.

Annaasat

Raajat akiisa appariartornerat Kalaallit Nunaannut qanoq sunniuteqarsinnaanersoq ima takussutissiivoq.

Raajat qalipallit kilomut 5 koruunimik akikinnerulernerat raajanik pisarineqartunut 70.400 tonsinut 254 million koruuninik annaasaqaataassaaq.

- Tamanna kingunerisaanik nunatta karsia 50 million koruuninik annaasaqassaaq, aalisartut akissarsiaat ikinnerulissapput, taamaasilluni akileraarutaat aamma ikinnerulissallutik, Henrik Leth oqarpoq.

Nunat tamalaat

Tuluit Nunaat EU-mi ilaasortaajunnaarniarnerat, USA aamma Kina niuernikkut sakkortuumik unammillernerat Kalaallit Nunaata aningaasaqarneranut eqquisinnaavoq.

- Qujanartumik Polar Seafoodip raajat kisimik isumalluutiginngilai, taamaattumik 2019-mi angusaqarluarnissarput naatsorsuutigaarput. 2020-mili qanoq pisoqaratarsinnaanera ernumanarpoq, Henrik Leth oqarpoq.
 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER