Namminersorlutik Oqartussat pingasunngornermi unnukkut Kalaallit Nunaata avannaarsuani Tunumilu Nunami Allanngutsaaliukkami Ella Ø-p eqqaani kangerloqarfinnilu tassunga qanittuni angalaarnissaq mianersoqqussuteqarpoq.

- Pingaartumik umiarsuit sinersorlutik takornariartitsisartut, sumiiffinnut pilersaarutaasumik angalasussat matumani pineqarput, Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik aamma Kalaallit Nunaanni politiit taama nalunaaruteqarput.

Nunap sajunneranut Richterip uuttuutaa malillugu sajuppillanneq 3,4-nik sakkortussuseqartoq paasineqarmat, mianersoqqussuteqartoqarpoq.

Sajoqqinnissaanut aarlerinartoqartoq

- Sajuppillannermi nunat eqqaaniittut sunnerneqarsimanissaat naatsorsuutigineqarpoq, taamaattumillu allanik pisoqassanngitsoq oqartoqarsinnaanngilaq.

Umiarsuarnik sinersortitsillutik takornariartitsisartut sumiiffimmiinnerminni mianersussasut, aammalu umiarsuit angalaarfissaasa pilersaarusiornerani allanik pisoqarsinnaanera naatsorsuutigissagaat inassutigineqarpoq.

- Tamatumunnga ilassutigalugu inassutigineqarpoq, ilaasut inuttallu nunamut niussanngitsut. Taamatuttaaq Issittumi Sakkutooqarfik pisoq pillugu nalunaarfigineqarpoq, ilaatigullu sumiiffiup isikkuanik uppernarsaasiornermi ikiuussimalluni, oqartussat allapput.

Mallit 30-nit 50 meterinut portussusillit

Oqartussat tassaarsuaqarneranut pissutaasumik misissuileruttorput. Nalunaarut naapertorlugu, takussutissat aallarniutaasut (pisumut) takutippaat, pisoqarfiusup qeqqata qanitaani mallit 30-niit 50 meterit tikillugit qaarsimasut:

- Taamaalillunilu kangerloqarfiup ilaani nunani immap 50 meterit tikillugit qaffassimaneranut takussutissaqarpoq, oqartussat allapput.

Pisoq GEUS-imit Ella Ø-p qanittuani arfininngornermi ullaap tungaani nalunaarsorneqarpoq.

Google Maps