Mianersoqqussut: Mailit peqquserlunniutaasut ingerlaartut

Mailit peqquserlunniutaasut ingerlaartut pillugit Tusass mianersoqqussuteqarpoq, taakku inuiaqatigiinni internetimik isumannaallisaanermut ulorianartorsiortitsipput.

Internetikkut peqquserlunniartut mianersorfigikkit.

Ulluni makkunani mailit uppernassusaat maluginiassallugu pissutissaqarluarpoq. Mailinik peqquserlunniutaasunik amerlasuunik ingerlaartoqarneranik, Tusass nalaataqartoq taama ilisimatitsivoq.

Tassani pingaartumik pineqarput mailisiat linkitallit isertaatinillu allaqqusillutik isernissamik qinnuiginnittut. Tamanna aamma pisinnaavoq ilisarisimasavit atia atorlugu allagarsinikkut.

Tusass inuiaqatigiinni nalunaarasuartaateqarnermik annertuumik ingerlatsisuugami aamma annertuumik akisussaaffeqarpoq taamaattumillu mailit pinerlunniutaasut ulluinnarni qanoq periuseqarfiginissaat ilisimaarilluarlugit, nalunaarummi taama allaqqasoqarpoq.

Mianersoqqusisut

Mailit taamaattut amerlanerpaartaat isumannaallisaanikkut immikkoortiterivikkutassigiinngitsutigut ingerlaarnerminni paasineqarlutik unitsinneqartarput - aamma Tusassimeertuusaarlutik ingerlaqqissimanerannit eqqugaasimasut toqqaannat saaffigisimavagut, maannalu aamma kikkut tamaasa mianersornissaannik ilisimatippagut taamaattumik nalaataqassagunik piareersimasinnaaniassammata.

Tusassimit siunnersuut pitsaasoq tassaavoq:

- Peqquserlunniarlutik qarasaasianut iserniartartut pikkorissigaluttuinnarput mailillu ilaarlugit iliuuseqarsinnaasarlutik, taamaattumik nalornissagaluaruit maili ammanngiinnassavat nassiussisimasutullu allaqqasoq sianerfigalugu qulakkeerniaqqaaruk paasiniarlugu taannaanersoq nassiussisimasoq. Mailisiatit Tusassimeersuttoqqissisimaffigisinnaagaluarlugit apeqqusersinnaasariaqarpatit. Mailisisimaguit linkimik tuugassartalimmik, taava Tusassimut sianerlutit paasiniaaqqaassaatit qulakkeerniarlugu ilumut Tusassimeersuunersoq.

Maili peqquserlunnianit pisuunersoq pasitsaassinnaavat makkua eqqumaffiginerisigut, pingaaruteqarporli aamma eqqarsaqqissaarlutit apeqqusiisinnaassuseqarnissat.

  • Nassiussisup ilumut taannaanissaa ilimanaateqarpasinngilaq
  • Paasissutissaatinnik immersueqquneqassaguit, linkimik fiilimilluunniit ammaaqquneqassaguit
  • Linki allamut “kukkusumut” pisitsissappat
  • “Kinguneqarsinnaanerarneqarpat” iliuusereqquneqartutut iliuuseqanngikkuit
  • Tuaviortuuppat
  • Allataq kukkuneqarpat allannerlutaappalluunniit

Mianersorfissat

Nalaatsortumik linki toortoorsimassagaluarukku isissutigisartakkallu aamma allassimallugu, taava piaartumik isissutigisartakkat allanngortissavat IT-millu immikkoortortaqarfissi attaveqarfigalugu.

Tusassip ukiuni kingullerni isumannaallisaaneq qaffasissutsikkut pitsaasumik inissinnikuuaa sillimaniarnikkullu piareersimalluni, taamaakkaluartoq aamma mianersoqqussutigaa inuup kukkuneratigut peqquserlunniat ajornaquteqanngitsumik iseriataarsinnaanerat pisinnaammat taamatullu nunarsuatsinni peqquserlunniarlutik Nunatsinnut pingaarutilinni inissisimasunut iserniartartut amerligaluttuinnarlutik.

Tusassip Nunatsinni inuiaqatigiit ingerlaannarnissaannut pingaarutilimmikinissisimasut sillimaniarnikkut annertusisamik eqqumaffeqarnissaasa pingaaruteqarluinnarnera erseqqissaassutigaa.

Powered by Labrador CMS