Mianersoqqussut: Ilulissani Syfilis atungaaleraluttuinnartoq

Ilulissani inuusuttut arlallit piffissap sivitsup ingerlanerani syfilisimik tunillatsissimapput, tamanna peqqutigalugu peqqissutsimut oqartussat Iluliarmiut aviisiat aqqutigalugu ilanngutassiaqarput.

- Inuusuttuni ukiukittunnguani syfilis akulikillingaluttuinnartoq napparsimavimmiik takusinnaavarput. Taamatut inuusuttut akornanni tuaviinnaq siaruaatipallassinnaanera annilaanganartuulluni, aviisimi ilanngutassiami Iluliarmiunut saaffiginnittumi taama allassimavoq.

Peqqissutsimut oqartussat kaammattuutigaat, usuup puuanik atuinissaq, usuup puuilu napparsimavimmi akeqanngitsumik pissarsiarineqarsinnaasut paasissutissiaralugu.

Kinguaassiutitigut nappaat ulorianartoq

Syfilis nappaataavoq ulorianartoq qaratsamullu sunniuteqarsinnaasoq. Takussutissat ilagaat ikit ammasut kinguaassiutitigut aammalu qanikkut. Ikit annernanngillat.

Sapaatit akunneri 6-8 qaangiukkaangata timikkut anillanneq takkussinnaasarpoq, napparsimasutullu misingaluni, kiaqarluni nukikkulluunniit annerisaqarluni, peqqinnissaqarfik aviisimi ilanngutassiami paasissutissiivoq.

Ernumanartoq

Nunatsinni Nakorsaaneqarfik 2016-imi syfilis-imik nalunaarutiginninnernik 71-inik tigusaqarpoq. Nappaat 2009 sioqqullugu nunatsinni atorneqarsimanngilaq, tamatumalu kingorna atorneqarnera annertusiartuinnarsimalluni.

- Syfilisip tuniluunnera ernumalersitsivoq. Taamaammat atoqateqalernermi usuup puuata atornissaa oqariartuutigissallugu pingaaruteqarpoq, nakorsaaneq 2017-imi maajimi saqqummiunneqartumi erseqqissaavoq.

Powered by Labrador CMS