Takornariartitsisartut innuttaasullu allat nannunik takusassarsiortitsisinnaanngorput. Akuersissulli eqqaamasariaqarpaat.

Nannunik takusassarsiortitsinissamut neqerooruteqarnissamut inatsisit nutaat periarfissiisut, Naalakkersuisut 6. marts akuersissutigaat.

Tassunga atatillugu akiliisitsilluni nannunik takusassarsiortitsilluni akuersissuteqarani neqerooruteqarnissaq inerteqqutaasoq, Naalakkersuisut maluginiaqquaat.

Nunanut Allanut, Inuussutissarsiornermut Niuernermullu Naalakkersuisoqarfimmut akuersissummik qinnuteqartoqarsinnaavoq. Akuersissummik tunineqarsinnaanermut ilaatigut piumasaqaataavoq qinnuteqartup Nunatsinni najugaqavissuunissaa, Naalakkersuisut tusagassiuutinut nalunaarummi taama allapput.

Naalakkersuisoq nuannaartoq

- Nuannaarutigaara maanna aamma uagut nunatsinni - Kalaallit Nunaanni – nannunik takusassarsiortitsisarnermik takornarianut neqerooruteqarsinnaalernerput, soorlu tamanna aamma nunani allani nanoqarfiusuni atuutereersoq.

- Taamaasillunilu maanna takornariartartunut misigisassaasinnaasut amerlaneruleqqipput, tamannalu nunatsinni najugalinnut takornariartitsisartunut iluaqutaasussaavoq, akuersissummik peqarlutik immikkuullarissumik misigisassarsiortitsisinnaalersussanut, Nunanut Allanut, Inuussutissarsiornermut Niuernermullu Naalakkersuisoq, Vivian Motzfeldt (S) oqarpoq.

Skema qinnuteqarfissaq akiliuteqartitsilluni nannunniarnertaqanngitsumik nannunik takusassarsiortitsisarnermut sullissivik.gl -imi nassaassaavoq.