Mianersoqqusisoqaraluartoq: Illuliortiternernut aningaasalersuineq pillugu inatsimmik allannguinissamut tapersersuineq
Inatsisartut Sanaartornermut Ataatsimiititaliaa isumaqarpoq, sanatitsisut namminersortut nutaanik inissialiornissamuttaarsigassarsiaritinneqartunik pisortanit taarsigassarsillutik, inissiat inissiatutattartortitsisarnerat unitsinneqartariaqartoq. Inatsimmik allannguinerup Nuummi inissaaleqisoqarnera ajornerulersissinnaavaa, Sulisitsisut mianersoqqusipput.
Sanatitsisut namminersortut aningaasaliisartullu amerliartuinnartut iluaqutigisaminnik pisortanit taarsigassarsillutik Nuummi inissialioriarlutik inissianik attartortitsisalersimapput. Taarsigassarsiat ilaatigut piffissami aalajangersimasumi ernialersugaanatillu akilersorneqartussaanngillat.
Naalakkersuisut taamatut ineriartortoqarnera inatsimmik allannguinikkut unitsikkusuppaat, inatsimmut allannguutissaq ukiakkut ataatsimiinnermi suliarineqartussaavoq.
Inatsit allanngortinneqarpat, innuttaasumut ataatsimut inissiamut ataasiinnarmut pisortanit taarsigassarsiaqarluni inissialiornissaq periarfissaalissaaq, taamaalilluni pisortanit taarsigassarsiaqarnikkut inissianik amerlanerusunik pigisaqarsinnaajunnaarluni.
Sanatitsisut namminersortut inissialiornissamut suli taarsigassarsisinnaassapput, piumasaqaataallunili inissiaq sanaartornerup naammassineranit kingusinnerpaamik qaammatit arfinillit qaangiunneranni inummut tunineqarsimanissaa.
Mianersoqqussut: Akileraarutitigut isertitat ikinnerusut inissiallu akitsoriartortut
Sanaartornermut Ataatsimiititaliap siunnersuut suliarisimavaa, amerlanerussuteqartullu, tassaasut Siumut Inuillu Ataqatigiit siunnersuut akuerineqartariaqartoq isumaqarput.
Nuummi sanatitsisoq namminersortoq – Martin Gjødvad, Inu:it Bolig A/S - Sulisitsisullu inatsisip allanngortinneqarnissaanik suliaqarnermut atatillugu ataatsimiititaliamik ataatsimeeqateqarsimapput.
Tassani ataatsimiititaliaq allannguinissamut mianersoqqusimavaat. isumaqaramik Nuummi inissaaleqiffioreeqisumi sanaartorneq unitsinneqassasoq.
Inatsimmik allannguisoqarpat sanaartornerup unikaallatsinneqarnerata saniatigut inissaaleqineq ajorseriarsinnaallunilu akileraarutitigut isertitat ikinnerulissapput aamma inissiat akitsoriartussapput, Sulisitsisut aamma Inu:it mianersoqqusipput.
Siunertamut naapertuutinngitsoq
Sanaartornermut Ataatsimiititaliami ilaasortat inissianut attartortikkanut tunngatillugu pisortanit taarsigassarsisarnerup isumassarsialaatsiannginneranik Naalakkersuisut isumaqarnerannut tunngaviusumik isumaqataapput:
- Sanatitsisut namminersortut aningaasaliisartullu pisortat aningaasaataat atornerlullugit inissialiorsinnaanissaat aningaasalersueqataanissamut taarsigassarsillutilluunniit inissianik attartortitsinissaq siunertaralugu inissianik pissarsisimiaannginnissaannik Naalakkersuisut siunertaqarnerat ataatsimiititaliamit isumaqatigineqarput. Tamanna ataatsimiititaliamit siunertamut tulluutinngitsoq isumaqarfigineqarpoq..
Ataatsimiititaliamit isumaqarput, inatsisissatut siunnersuut innuttaasunut sanatitsisartunullu imaannaanngitsunik kinguneqarsinnaasoq, tassa Nuummi sanaartorneq tamatuma unitsissappagu.
Ataatsimiititaliarli isumaqarpoq, inatsimmik allannguinerup qanorpiaq aningaasaqarnikkut kinguneqarsinnaaneranik Naalakkersuisut erseqqissaassuteqarsimanngitsut:
- Taamaarnmat ilisimaneqanngitsunik inatsisissatut siunnersuutip matuma akuersissutigineqarnissaa inuiaqatigiinnut arlalitsigut aarlerinaateqarpoq, ataatsimiititaliaq allappoq.
Ataatsimiititaliami ilaasortat isumaqatigiinngittut
Ataatsimiititaliami ikinnerussuteqartut, tassaasut Demokraatit Partii Naleqqallu kissaatigaat, siunnersuummut partiit akuersaassappata Naalakkersuisut siunnersuummik allannguissasut.
Partiit taakku marluullutik kissaatigaat, sanatitsisisut pisortanit taarsigassarsinermikkut inissialiaminnik tunisaqarnissaannut qaammatinit arfinilinnit sivisunerusumik periarfissaqartinneqassasut.
Partiit marluk taakku naapertorlugit, inatsimmik allannguinerup kinguneranik sanaartornerup unittoornissaa tamatuma pinngitsoortissavaa.
