MGP: Ataqatigiinneq - Herningimiit Katuamut
Julie Berthelsenip Nina Kreutzmann Jørgensenillu erinarsugaat League of Light ataqatigiinnermut tunngasuusoq, erinarsortartut marluk Herningimi Jyske Bank Boxenimi Melodi Grand Prixertoqarnerani erinarsulinnginnerminni taama nassuiaapput.
Katuami ataatsimoortoqarluarpoq, inuimmi 500-t missaat Grand Priximik isiginnaariarlutik takkussimapput. Ukioq mannalu Grand Prix immikkuullarilluinnartutut ippoq, Julie aamma Nina tusarnaartitsimmata.
Erinarsortartut marluk skærmimi saqqummeraangata Katuami nuannattoqartarpoq. Erinarsortartut tusarnaartitsereermata tv-kkut saqqummiisut erinarsortussamik normu 8-mik saqqummiinerat tusarsaajunnaartillugu allaat ersaattaattoqarpoq.
Unammineq nereqatigiinnerlu
Pisoqarnerata nalaani unammisitsisoqarpoq, unamminermi Qarsoq aamma Asukikkut tusarnaartitsinerannut meeqqanullu filmeriarnissamut billetsinik unammisitsisoqarluni.
Isiginnaariaqataasut melodi grand prix naammassippat nereqatigiissapput.
Paarlersuup saniatigut ineeqqami aamma skærmeqarpoq, tassanili attavilulluni. Ineeraq mikigaluartoq ammarlugu paarlersuarmut ammatinneqalersimavoq, nerriviillu nerisassanik ulikkaartut takutippaat unnuk immikkuullarilluinnartuusoq.
Erinarsorluni unamminerup naammassinissaata tungaanut pissangasoqarpoq, Julie Ninalu anngunniutivinnermi anngupput, Leonoramilli qaangerneqarlutik.