MGP-mi musikvideo Marcimit suliarineqarpoq
Juliep aamma Ninap Dansk Melodi Grand Priximi erinarsugassaat musikvideoliarineqaqqammerpoq. Tassunga Marc Fussing Rosbach suliarinnittuuvoq
- Nuannaarpunga tanngassimaarutigalugulu Juliep aamma Ninap musikvideoliaat suliarisinnaagakku.
Filmiliortartoq Marc Fussing Rosbach Sermitsiaq.AG-mut oqarpoq, taassuma musikvideo 'League of Light' suliaraa.
Ullut sisamat iluani suliaq
Marc Fussing Rosbach sapaatit akunneri marluunngillalluunniit attaveqarfigineqarpoq aperineqarlunilu una suliarisinnaannginneraa.
- Sukkasoorujussuarmik suliarivara. Musikvideo qanoq suliarineqassanersoq sivikitsumik eqqarsaatigeriarlugu aallartippara. Nina Kreutzmann Jørgensenip Nuummiinnerani tarratut ersitsillugu filmiliaraara, Julie Berthelsenilu maani Nuummiissinnaanngeriarmat mobilia atorlugu filmiliortippara. Musikvideo ulluni sisamani suliarivara, Marc Fussing Rosbach oqarpoq.
Musikvideoliornera periarfissiilluarsinnaasoq ilimagaa.
- Qujanartumik suliara tigulluarneqaqaaq. Imaassinnaavoq nunani allani filmiliortartut una takugaat, imaassinnaavorlu arlaatigut suleqatigiumaneqariasaartunga. Qanorluunniit pisoqarsinnaavoq, oqarpoq.
Julie Ninalu illersussavai
- Arfininngormat Melodi Grand Prix malinnaaffigissaviuk?
- Naak siornatigut soqutigivallaanngikkaluarlugu ukioq manna soqutigilluarpara. Juliep Ninallu ajugaanissaat ilimanarluarsinnaavoq, Marc Fussing Rosbach oqarpoq.