Skip to main content

Mexicomi unammiuaarnermi Kalaallit Nunaat ajugaavoq

Amerikap Nunavissuani pissartanngorniunnissamut anngunniunnermi tallimanngormat Kalaallit Nunaat sisamassaa tulleriisiinnarlugit ajugaavoq

Cubamut, Puerto Ricomut Mexicomullu unamminerit siulliit pingasut assigalugit USA-p kalaallit assammik arsarluni nunanut allanut unammisartui arsarluaqisut saperpai. Unamminermi kalaallit 30-27-mik ajugaapput, muminnermi 16-13-imik siuaqqasimallutik.

Kalaallit arsallaqqinnersaat Akutaaneq Kreutzmann unamminermi peqataanngilaq, Andreas Lorentzenilu napparsimakujussimalluni.

Sungiusaasup kalaallit nersualaarpai
Mexico Citymit tusagassiorfinnut nalunaarutikkut nunanut allanut unammisartut sungiusaasuat Niels Møller oqaluttuarpoq USA-mut unammineq naammaginartumik aqussinnaasimagitsik, unammisartut tamaviaarluarmata taarseraalluarlugillu atorlugit.

Sungiusaasoq ilanngullugu allappoq Mexicomi angusat kalaallit assammik arsarnermik aallussilluarnerannik takutitsisoq, minnerunngitsumik klubbini sulilluartoqarneratigut, tamannalu takuneqarsinnaasoq unammisartunit tamarmiusunit 15-init 11-it ulluinnarni Kalaallit Nunaanni unammisartuunerannik. Unammiuaarnermi unammisartut arfinillit siullermeersumik nunanut allanut unammeqataapput.

Tallimanngornermi unamminerup aappaani Cubap Mexico 31-21-mik ajugaaffigaa. Kalaallit Nunaata unammiuaarnermi nunani kisiartaalluni unamminissat sisamat tamaasa ingerlatererpai. Unammisartut arfininngornermi qasuersaassapput, Cuballu Puerto Ricomut, USA-llu Mexicomut unamminerat isiginnaarsinnaavaat. USA Mexicolu normu 3-ngorniutissapput.

Ullumi unamminerit marluk ingerlanneqareerpata unammiuaarnersuarni pisarnertut naggataarnersiortoqassaaq præmie-nik tunniussisoqarluni.

105-issaa nunanut allanut unammivoq
Rasmus Larsenip nammineq rekordini qaangeqattaartuarpai. Tallimanngormat 105-issaa nunanut allanut unammivoq, soorunamilu Kalaallit Nunaata unammiuaarnermi ajugaanera nuannaarutigalugulu tulluusimaarutigaa, Mexicomiillu kingumut qivialaarluni Sermitsiamut imatut oqarpoq:

– Pissutsit nutaarluinnaapput unammiuaarnerup naammassinissaa ullormik ataatsimik sioqqullugu ajugaasutut inissereeratta. Unammineq pingaarnerpaaq tassaasimavoq unamminerput siulleq Cubamut. Cubamiut unammillugit sakkortoqaat. Qujanartumik piumassutsikkut sakkortussursikkullu angumasinnaavagut, minnerunngitsumillu assersuinerput nalissaqanngilaq. Puerto Rico Mexicolu ajugaaffigaavut, unammisartullu nunani tamalaani unamminermik misilittagaqalerput.

– USA unammigaangatsigu naligiittuartarsimaqaagut, taamaattumik nuanneqaaq Akutaaneq ilaginagu ajugaaffigigatsigit.

Ungasissumukaqqissapput - tamatumuuna Uruguay-mut
Mexicomi unammiuaarnermi ajugaasutut Kalaallit Nunaat Amerikap Nunavissuani pissartanngorniunnissamut annguppoq, tamannalu Uruguay-mi Montevideo-mi juuni 22-annit 29-annut ingerlanneqassaaq.
Nunat qulit peqataassapput, tassanilu 2015-mi januaarimi Qatar-imi nunarsuarmi pissartanngorniunnissamut inissat pingasut unammissutigissavaat. Nunat assammik arsartartorissaartut Brasilia, Argentina aamma Chile peqataassapput.
Kalaallit Nunaat sisamassaa VM-imut anngutissappat nunanut allanut unammisartut piareersarluartariaqarput unammisartuvullu sukalanerpaat unammisoralugit.

Unammiuaarnermi maanna inissisimanerit:
                          Unamminerit       Isertitat         Point

Kal. Nunaat                4                 131-107             8
Cuba                           3                   79-67               4
Mexico                        3                   78-83               2
USA                             3                   71-77               2
Puerto Rico                3                   76-101             0

Unamminermi kalaallit isertitsisui:

  • Eqalunnguaq Kristiansen 5
  • Danny Brandt 4
  • Miki Heilmann 4
  • Nuka Heilmann 4
  • Nuuno Lars Olsen 3
  • Aqqaluk Ingemann 3
  • Andreas Lorentzen 2
  • Miilu Rosing 2
  • Finn Lynge Federiksen 2
  • Aqqa Lings 1

Unammiuaarnermi kalaallit isertitsisut:

  • Danny Brandt 22
  • Miilu Rosing 20
  • Miki Heilmann 18
  • Akutaaneq Kreutzmann 17
  • Eqalunnguaq Kristiansen 14
  • Andreas Lorentzen 12
  • Nuka Heilmann 11
  • Nuuno Lars Olsen 7
  • Aqqaluk Ingemann 5
  • Finn Frederiksen 3
  • Aqqa Lings 1
  • Rasmus Larsen 1
OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER