Mettep orsoq kajortoq ujaraa
Kalaallip nakorsap ph.d.-nngorniutitut suliani suliarileruttorpaa, tamatumani paasiniaramiuk kalaallit inunnit allanit orsumik kajortumik peqqinnartumik taaneqartartumik inunnit allanit orsoqarnerunersut.
Orsoq orsuinnaanngilaq. Qaqortumik orsoqarlunilu – taava aamma kajortumik orsoqarpoq. Orsoq kajortoq pitsaasuuvoq, tassami nappaaterpassuarnik pinaveersaartitsisarami, Mette Motzfeldt Jensen taama nassuiaavoq, taanna Aalborg Universitetshospitalimi nakorsaavoq, Ilisimatusarfimmilu ph.d.-nngorniutiminik suliaqaleruttorluni.
Aviisi Sermitsiaq taama allappoq.
- Jyllandip Avannaani inunnik misissuininni peqataarusuttunik maanna ujaasileruttorpunga, tamatumani uppernarsarniarneqarluni kalaallit inunnit allanit orsumik kajortumik orsoqarnerunersut.
- Tassami paasineqarsimagami inuit silap pissusiani nillertumi silami sulisartut, inunnit allanit kajortumik orsoqarnerusartut. Tamatumani soorlu pineqarlutik kalaallit aalisartut piniartullu – tamannalu uppernarsarusupparput.
Timip inuussutissanik suliarinninneranut pingaarutilerujussuaq
- Inuit tamarmik inunngornerminni kajortumik orsoqartarput. Ingammik timip qulerpiaani qutut eqqaanni inissisimasarput. Piffissalli ingerlanerani orsoq kajortoq nungukkiartortarpoq nunguttarlunilu – tamanna pitsaanngilaq, orsormi kajortoq timip inuussutissanik suliarinninneranut pingaarutilerujussuugami, Mette Motzfeldt Jensen nassuiaavoq.
Orsoq kajortoq peqqinnartuuvoq, taannami oqimaappallaalernissamut, pualavallaalernissamut, taqqakkut milittoorutinut, aap naqitsinerata qaffasippallaarneranut aamma diabetisimut illersuutaagami. Kalaallit inunnit allanit kajortumik orsoqarnerusut isumaqassalluta pissutissaqarluarpugut.
Aviisimi Sermitsiami atuarnerusinnaavutit. Aviisi uani pissarsiariuk:
