Mette F: Russit aqqartartui nakkutigineqarnerusariaqarput
Ministeriuneq Issittumi illersornissamut immikkut 1,5 milliarder koruuninik atuiniarpoq. Aningaasat nakkutilliinerup nukittorsarneqarnissaanut siullertut atorneqassapput.
Nalagaaffiit pissaanilissuit imminnut unamminerisa russillu aqqartartuminnik suliaqartitsinerulernerisa ilaatigut Illersornissaqarfik Issittumi immikkut 1,5 milliarder koruuninik atuisariaqartilersimavaat.
Ministeriuneq Mette Frederiksen (Soc) folketingimi apeqqarissaartoqarnerani taamatut oqarpoq.
Ministeriunerup sapaatip akunnerani kingullermi nalunaarutigaa, Issittumi illersornissaqarfiup suliaqarneranut aningaasanik nuussisoqalersoq. Aningaasallu taakku nakkutilliinerup nukittorsarneqarnissaanut siullertut atorneqassasut.
Aki-Matilda Høegh-Dam (S) nakkutilliinermut pineqartumut tassunga apeqquteqarpoq.
- Issittoq pingaaruteqartuaannarpoq imminermilu nammineq pingaaruteqarluni, Issittumili isumannaallisaaneq naalagaaffiillu pissaanilissuit soqutiginninnerat eqqarsaatigalugit allanngoriartortoqarmat, Naalagaaffeqatigiinni nunat pingasuulluta pisussaaffigaarput Issittoq pillugu suli oqaloqatigiinnerunissarput, Mette Frederiksen akissutini aallarnerlugit oqarpoq.
- Nakkutilliineq Issittorlu pineqartillugit, uanga isinni arlallit pineqartarput. Satellitsikkut radarikkullu nakkutilliineq pineqarsinnaavoq, silaannakkut angallannermi susoqarnersoq pineqarsinnaavoq aammali imaani susoqarnersoq pineqarsinnaalluni.
Aqqartartut
Illersornissamut tunngatillugu ilisimasallit arlaleriarlutik oqaatigisarsimavaat danskit illersornissaqarfiata immap iluani nakkutilliisarnera iluaqutaasanngitsoq.
- Piffissap ingerlanerani russit aqqartartuminnik suliaqarnerulernerat takusimavarput, naalakkersuisullu sumiiffik ataaseq eqqarsaatigalugu isumaqarput, nakkutilliinermut tunngatillugu isumalluutinik atuisoqarnerusoqartariaqartoq.
- Tamanna soorunami Kalaallit Nunaannik savalimmiunillu qanimut oqaloqqatigiissutigisussaavarput, siunissamilu oqaloqatigiissutigiunaartussaallugu.
- Ataatsimoorussatta qulakkeerneqarnissaat ataatsimoorluta suliassaraarput.
- Soorunami Issittumut tunngatillugu nakkutilliisarneq aaqqissuussaasumik maanna oqaluuserilernerangut pissutaavoq akerleriissutaasut annertusiartornerat, Mette Frederiksen naggasiivoq.