Mette Frederiksen: Kalaallit Nunaat nunanut allanut politikkikkut piginnaaneqarnerusariaqarpoq
Kalaallit Nunaata nunanut allanut politikkianut danskit politikeriisa aalajangiisussaanerat ullutsinnut naleqqukkunnaarpoq, Socialdemokraatit siulittaasuat taama oqarpoq. Nunarpullu nunanut allanut politikkikkut piginnaaneqarnerulersinniarlugu inatsit tunngaviusoq periarfissarsiorfigissallugu piareersimaffigaa.
Nunatta Savalimmiullu nunanut allanut politikkikkut namminneq aalajangiisinnaanerulernissaat oqaloqatigiissutigissallugu Socialdemokraatit siulittaasuata Mette Frederiksenip (S) piareersimaffigaa. KNR-imut taama oqarpoq.
- Sumummi iluaqutaassava Kalaallit Nunaannut Savalimmiunullu suna pingaaruteqarnersoq Københavnimi nalilersuiffigineqartassappat. Taamaammat aamma oqanngilanga: ’suliassaqarfiit amerlanerusut oqartussaaffigilernissaat aalluttariaqarparsi’, nalunngilarami nunanut allanut politikki Kalaallit Nunaanni Savalimmiunilu amerlaasunit pingaartinneqartoq.
Naalagaaffeqatigiit nunanut allanut politikkiat tamarmiusoq Københavnimi Nunanut allanut ministereqarfimmit pisortatigoortumik ullumikkut ingerlanneqarpoq.
Sulialli nunatsinnut Savalimmiunullu tunngassuteqartut pillugit nunatsinni naalakkersuisut Savalimmiunilu naalakkersuisut qanittumik oqaloqatigineqartarput.
Inatsit tunngaviusoq periarfissarsiorfigineqarsinnaavoq
Tamannali nunanut allanut politikkikkut isumaqatigiinnermik nalinginnaasumik kinguneqarsimanngilaq.
Danmarkimmi EU-mut tunngatillugu eqqumaffigisassaqarnera, nunatta nunanit allanit aningaasaliissutissanik pisariaqartitsinera Savalimmiullu Ruslandimik niueqateqarnerat Nuup, Tórshavnip Københavnillu akornanni isumaqatigiinngissutigineqartuartut ilagiinnarpaat.
Mette Frederiksenip tamakku qimakkusunnerarpai.
- Nunanut allanut politikkimut tunngatillugu oqaasissaqartitaanerulernissaq annertuumik kissaatigineqartoq tusaraangakku, taava isumaliortarpunga eqqornerussasoq oqassalluni: ’Issiaqatigiilluta oqaloqatigiissutigisigu: Suliaqarfinni isumaqatigiissutigivissunngisatta ilaani periarfissaqarnerulersitsisinnaavugut?'
- Nunat avannarliit Siunnersuisoqatigiivi, issittumut tunngasut, aalisarneq allallu pillugit oqaasissaqartitaanerulersinissaq akuerineqarluni, Mette Frederiksen oqarpoq.
Løkkep naalakkersuisui aamma taamaaliorput
Ministeriunerulli Lars Løkke Rasmussenip (V) tamanna angorusullugu 2017-imi aasakkut aamma oqaatigaa.
Naalagaaffeqatigiinni siuttut, naalakkersuisut siulittaasuat Kim Kielsen aamma Savalimmiuni Lagmandi Aksel V. Johannsen ataatsimeeqatiginerini isumaqatigiissutigaa nunatta Savalimmiullu DFG-mik aaqqissuussinermik taagorneqartoq aqqutigalugu - tassalu Danmarkip, Savalimmiut nunattalu nunanut allanut politikkikkut suleqatigiinnerat - periarfissaqarnerulersitsisoqarsinnaanersoq misissorneqassasoq.
Maannali - ukiut marluk affarlu ingerlareersut - suliaq suli naammassineqarsimanngitsoq, Nunanut allanut tunngasunut ministereqarfik KNR-imut ilisimatitsivoq.
Danskit inatsisinik atuutitsinermut ministereqarfiannit nassuiaatigineqartoq naapertorlugu naalagaaffeqatigiinnermut ataatsimoortumillu nunanut allanut politikkeqarnermut killiliussat inatsimmi tunngaviusumi aalajangersarneqarput. Tamatumali nassuiaatigineqarnera Mette Frederiksenip periarfissarsiorfigerusuppaa.
- Uangami nammineq inatsisinik atuutsitsinermut ministerioreerpunga (2014-imit 2015-imut, aaqq.), ministeriunermalu nalaani inatsisitigut periarfissaanngitsutut oqaatigineqartut ilaat allat naalakkersuisuutitaqarnerisa nalaanni pisinnaasimasut maanna takusinnaavara. Inatsisit ilaatigut erseqqilluinnartuusarput - ilaatigullu aamma allatut nassuiaateqarnissamut inassaqartitsisarlutik.
Frederiksen: Qanoq paasinninnissamut inissaqartitsisoqassaaq – inatsilli tunngaviusoq nutarterneqassanngilaq
Socialdemokraatit siulittaasuata erseqqissaatigaa nammineq ukiuni inuuffigisamini, ukiuni 41-ni, Danmarkip nunattalu akornanni sorpassuit allanngorsimasut. Ukiunilu tulliuttuni 40-ni aamma taamaattariaqartoq.
- Ullumikkut suleqatigiinnermi ingerlaaserineqartup inatsisip tunngaviusup iluani taamaaqqissaartariaqarneranik oqartissinnaanngilarma. Siammasinnerusumik allaanerusumillu iliortoqarsinnaanersoq oqaloqatigiissutigissallugu piareersimaffigiuaannassavara.
Nunarpulli qanoq sutigullu nunanut allanut politikkikkut aalajangiisinnaanerulissanersoq Mette Frederiksenip "qularnaatsumik oqaatigerusunngilaa”.
Inatsisilli tunngaviusup nutarterneqarneratut annertutigisumik suliaqassalluni piareersimaffiginngilaa.
- Inuiaqatigiimmi tamarmiusut toqqammavigaat. Taamaammat imaaliinnarluni inatsimmik tunngaviusumik allanngortitsisoqarsinnaanngilaq. Taamaammallu allamik eqqarsaateqarpunga: Inatsisip tunngaviusup atuuttup iluani periarfissaqarnerulersitsisoqarsinnaanersoq misissorusunneruara, Mette Frederiksen oqarpoq.