Skip to main content

Mette Frederiksenip USA-mik suleqateqarneq pillugu Kim Kielsen ataatsimeeqatigisssagaa

Aaja Chemnitz Larsenip USA-mik siunnerfeqarluni suleqatigiinnissamik pilersaaruteqarnermut Kalaallit Nunaata naammaginartumik peqataatinneqarsimannginneranik isornartorsiuinera ministeriunerup itigartippaa.

Ministeriunerup Mette Frederiksenip (Soc) Issittoq pillugu siunnerfilimmik suleqateqarnissamik præsident Donald Trumpimik isumaqatigiissutissaq pillugu (Soc) Kim Kielsen Savalimmiunilu lagmand Bárður qanittukkut ataatsimeeqatigissavai. Tamatumunnga peqatigitillugu Aaja Chemnitz Larsenip Kalaallit Nunaata naammaginartumik peqataatinneqarsimannginneranik isornartorsiuinera itigartippaa.

- Issittumut tunngatillugu USA-mik siunnerfilimmik suleqateqarnissaq pillugu ataatsimoorussamik nalunaaruteqaratta, Savalimmiut Kalaallillu Nunaat peqatigalugit suliassaq aalajangersimavarput. Taamatullu iliorsimanerput isumanga malillugu eqqortuuvoq. Suliap taassuma ingerlateqqinneqarnissaa pillugu Naalakkersuisut Siulittaasuat lagmandilu - qanittukkut - ataatsimeeqatigeqqissallugit isumaqatigiissuteqarnikuuvunga. Issittumullu tunngatillugu USA-mik siunnerfeqarluni suleqateqanissaq Naalagaaffeqatigiit isumaqatigiissutiginikuuaat, ministeriuneq IA-mi politikkerip apeqqutaanut akissuteqarluni oqarpoq.

Londonimi NATO-p ataatsimeersuarneranut atatillugu suleqatigiinnissaq Donald Trumpimik isumaqatigiissutigineqarpoq.

- Isumaqarpunga suliassap taamatut ingerlanneqarnera eqqortuusoq, aamma nuannaarutigaara Amerikamiut tamanna uppernarsarlugu suliassamut tassunga aallussilluarusunnerat. Isumaqarpunga tamatuma Issittoq nukittorsassagaa, aamma Naalagaaffeqatigiit USA-llu qanimut attaveqatigiinnerat tamatuma nukittorsassagaa.

IA isumaqatigiissutinik unioqqutitsineraasoq

Aaja Chemnitz Larsen (IA) isumaqarpoq, Donald Trump ataatsimeeqatigineqarmat Kalaallit Nunaat peqataatinneqartariaqaraluartoq. Taannami isumaqarpoq peqataatitsinnginnikkut Igalikumi Itillimilu isumaqatigiissutit unioqqutinneqarsimasut. Tassa Issittoq pineqartillugu Kalaallit Nunaata peqataatinneqartarnissaa isumaqatigiissutaammat. Mette Frederiksenili (Soc) oqarpoq, Trumpimik ataatsimeeqateqarnermi Issittoq kisiat pinnagu allat tamarmik sammineqartut.

- Amerikamiut præsidentiat illugalugu ataatsimeeqateqarninni soorunami Danmarkimi ministeriunertut ataatsimeeqatigaara. Aalajangersimasumik sammisaqarluni ataatsimeeqatigiinnerunngilaq, Danmarkip USA-llu attaveqatigiittarnerat pillugu ataatsimeeqatigiinneruvoq. Soorunami Issittoq kikkunnit tamanit oqaluuserineqarmat Issittoq tikillatsiarneqarpoq.

- Soorunami Danmarkip ministeriuneratut Amerikami præsidenti illugalugu ataatsimeeqatigisinnaasariaqarpara, Naalagaaffeqatigiillu soqutigisaat, tassa Naalagaaffeqatigiit tamarmiullutik soqutigasaat sorsuutigalugit.

- Qanimut oqaloqatigiittoqarnissaa uanga suliassaraara

Aaja Chemnitz Larsenilli akissut naammaginngilaa. Mette Frederiksenip nammineq oqaaserisimasai eqqaasitsissutigai, tassalu  imatut oqaaseqarsimanera 'sumummi iluaqutaassava Kalaallit Nunaannut Savalimmiunullu suna pingaaruteqarnersoq Københavnimi nalilersuiffigineqartassappat' Donald Trumpimillu ataatsimeeqateqarnissamut Kim Kielsen peqataaqqullugu qaaqquneqarsinaersoq toqqaannaq apeqqutigalugu.

- Amerikamiut præsidentiata danskillu ministeriunerata illugiillutik ataatsimeeqatigiinnerat matumani pineqarpoq, NATO-llu ataatsimeersuarneranni aallartitat allat soorunami ilagivaannga. Isumaqarpunga pingaaruteqartoq erseqqissaatigissallugu NATO-mi ilaasortaaneq pineqarmat, tassanilu Danmark NATO-mut ilaasortaavoq aamma USA NATO-mut ilaasortaavoq, NATO-milu suleqatigiinnitsinnut atatillugu ataatsimeeqatigiinneq pimmat.

Taamatullu ittumik ataatsimeeqatigiittoqarnerani sammisassat suugaluilluunniit oqaluuserineqarsinnaasariaqarput, ministeriuneq oqarpoq.

- Issittoq pineqartillugu aamma Naalagaaffeqatigiinneq pineqartillugu suliassarivara, Savalimmiut Kalaallillu Nunaata qanimut oqaloqatigineqarnissaat.

Erseqqissaatigaa siunnerfilimmik suleqatigiinneq sorpianik imaqassanersoq oqaatigissallugu siusippallaartoq, suliarmi aatsaat aallartisarneqaleruttormat - erseqqissaatigeqqippaa tamanna Kalaallit Nunaannik Savalimminillu peqateqarluni ingerlanneqarmat.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER