Mette Frederiksenip peqatigiilluni namminiilivikkiartornissamut ammavoq
Mette Frederiksen Danmarkimi statsministerinngussaguni, Kalaallit Nunaannut atassuteqarnermi nutaamik sammiveqalernissaq naatsorsuutigineqarsinnaavoq. Martin Breum nalilersuinermini taama allappoq.
Danmarkip immaqa statsministerissaa, Mette Frederiksen, siullermeersuni kalaallit namminiilivinnissamut ilungersuussaqarnerannut qanoq isiginninnerluni ammarpoq. Tamanna Martin Breumip atuakkiaani saqqummilersumi ’Hvis Grønland river sig løs - en rejse i kongerigets sprækker’, apersorneqarnermini tamanna pivoq.
Taanna namminiilivinnissamut sulissuteqarnianngilaq, kisianni ima oqarpoq:
- Isumaqarpunga kalaalerpassuit akornanni ullut ilaanni namminiilivinnissamik angusaqarsinnaanermik soorunami kissaateqarneq namminersornerulernermiit namminersornermut ineriartornerup ingerlasimanerata pissusissamisoortumik malitsigissagaa, oqarpoq.
Danmarkip Kalaallit Nunaannut oqartussaaneruffigisaanik
Naak kalaallit siutaannik tusaallugu oqaaseqarnera uissuumminarpallaanngikkaluartoq, statsministeritut qinigassanngortittup taama oqarnera maluginiarneqartariaqartoq, Martin Breum isumaqarpoq. Tassami aatsaat siullermeerluni danskit naalakkersuinermik sulialinni taama qaffasitsigisumik inissisimasumit oqaaseqartoqarpoq.
- Ministeriunerusartut tamarmik — aamma Socialdemokratineersut — namminersornerunerup 1979-imi eqqunneqarneraniilli nammineernerulernissamik takorluukkamut ataqqinninnerminnik ersersitsisarsimapput, kisianni tamarmik aamma naalagaaffeqatigiinneq Danmarkip Kalaallit Nunaannut oqartussaaneruffigisaanik imaqartoq attaveqatigiinnermi sinaakkutitut, nammineq pingaartitarisamissut, aamma ungasinnerusoq eqqarsaatigalugu, tikkuartarsimavaat, Martin Breum Sermitsiami naliliinermini taama allappoq.
- Mette Frederiksen ingasaallugu nassuiarniarneqassanngilaq, kisianni naalagaaffeqatigiinnerup nammineq isiginnittaasiani ataavartussatut isumaqarfigineqartariaqannginneranik erseqqissaassuteqarnera nutaajuvoq. Kalallit Nunaata namminiilivinnissaa isiinnittaatsimi tassani siunissami ukiorpassuarnik ungasitsigisumiikkunarpoq, taama pisoqassagaluarpat, kisiannili siunissami ungasinnerusumi aqqutissat immaqa ineriartornarnerpaartaattut matunneqartariaqanngilaq.
Mette Frederiksenip oqaaseqarnerani Martin Breumip naliliinera ilisimasalinnit arlalinnit Weekendavisenip atuakkamik tigulaarinnilluni saqqummersitaani isumaqatigineqarpoq. Naliliinermili kikkut tamarmik isumaqataanngillat, atorfilittaasimasoq aamma aaqqissuisoq, Bo Lidegaard, Kalaallit Nunaannut attaveqarnermut atatillugu politikkimi ingerlanneqartumut allannguingaarnavianngitsoq isumaqarpoq.
“Hvis Grønland river sig løs – en rejse i kongerigets sprækker” Martin Breumimit atuakkiarineqartoq apriilip pingajuanni Gyldendalikkut saqqummissaaq.
Sermitsiami ullumi saqqummertumi naliliineq tamaat atuarsinnaavat: