Ministeriuneq Mette Frederiksen (Soc.) Nuummi Hans Egedep Illuani naalagaaffiit ataatsimiinnerannut marlunngorpat 6. juni peqataalerpat, nipaatsumik akerliussutsimik takutitsisoqassooq.

Spiralilersuisimanermut tunngatillugu pineqartut aamma inatsisitigut ataataqanngitsut, suliani susoqartannginnera pillugu isornartorsiuinertik akerliussutsimik takutitsinermi oqariartuutigissavaat.

Nutaarsiassaqartitsivik KNR taama allappoq.

- Tassa qallunaat naalakkersuisuisa siulittaasuat, Mette Frederiksen, qullerpaartaasutut maannakkut akuliuttariaqalersoq piumasaqarluni, suliassaq sivitsorsarneqarani naammassineqartariaqartoq. Naalagaaffiup kukkuluttornera ersarereertoq qaangiataaginnarneqarsinnaanngitsoq, Klaus Frederiksen oqarpoq, inatsisitigut ataataqanngitsoq akerliussutsimillu takutitsinissamut aaqqissuusseqataasoq KNR-imut oqarpoq.

Isornartorsiuisoqareersorlu Nuummi ataatsimiilertut

Naalagaaffiit ukiumoortumik ataatsimiinnerat Nuummi marlunngornermi 6. juni pissaaq. Ataatsimiinnissaq suli pinngitsoq Danmarkip Kalaallit Nunaatalu akornanni suleqatigiinniarnerup kipiluttunarnera pillugu arlalinnik isornartorsiuisoqarsimavoq.

Naalakkersuisut siulittaasuata, Múte B. Egede spiralilersuineq pillugu qulaajaanissamik suliaq Danmarkip paamaarukkaa isornartorsiuisimavoq.

Danmarkimiit ministeriuneq, Naalakkersuisut siulittaasuat Savalimmiullu lagmandiat naalagaaffiit ataatsimiinneranni peqataasarput. Savalimmiuni siorna ataatsimiinneq ingerlanneqarpoq.

Naalagaaffiit ataatsimiinnissaat sioqqutitsiarlugu Mette Frederiksen USA-miissaaq, præsident Joe Biden ataasinngornermi 5. juni ataatsimeeqatigissallugu.