tikeraaq

Mette Frederiksen: Namminersulivinnissamik kissaatigisaq paasisinnaalluarpara

Pissusiviusut paasiniarlugit qanimut takunissaat uannut pingaaruteqarpoq, Socialdemokraatit siulittaasuat Kalaallit Nunaannut tikeraarngaarnermini oqarpoq

Mette Frederiksen, formand for Socialdemokratiet
Mette Frederiksen: – Peqatigiittut naligiissutit oqaloqatigiittassaagut maniguulluta ataqqeqatigiillutalu.

Socialdemokratit siulittaasuat ministeriuninngortussatullu piukkanneqartut ilaat Mette Frederiksen Kalaallit Nunatsinniippoq.

– Maaniippunga Kalaallit Nunaata Danmarkillu akornanni pissutsit tusarniarlugit paasiniarlugillu. Isumaqarpunga pissusiviusut paasiniarlugit qanimut takuneqartariaqartut, Mette Frederiksen Nunatsinnut tikeraarnini pillugu oqarpoq nangillunilu:

– Maanngarnera nuannaarutigaara attaveqaqatigiinnerpullu uppernarsillugu, aammalu paasisaqarfiginerullugu kalaallit-qallunaat peqatigiinnerat kalaallinit isigalugu qanoq ittuunersoq.

– Kalaallit Nunaat Danmarkilu peqatigiissutut naligiissutit isigaakka, oqaluttuarisaanerminnik pingaarutilimmik avitseqatigiittut, imminnullu qanittumik tatigeqatigiissumillu attaveqartut.

– Namminersulivinnissaq sammineqartorujussuuvoq. Namminersulivinnissamillu kissaateqarneq paasisinnaalluarpara. Pineqarpoq immitsinnut naligiissutut peqatigiittutullu pinissarput, maniguuttumik ataqqinnittumilu, ministeriuninngortussatut piukkussaq oqarpoq, taassumalu apeqqutit ajornakusoortut oqaluuserinissaat ersiginngilaa.

Taanna tallimanngormat Nuummut tikippoq SIK-llu ukiunik 60-inngortorsiorluni nalliuttorsiornerani peqataalluni. Marlunngorpat Qaqortumut ingerlaqqissaaq Siumup aasaanerani ataatsimiinneranut peqataajartorluni. Sapaatip akunnerata naanerani sivisuunik ataatsimeeqattaarpoq, nunatsinni pissusiviusut paasiniarlugit.

Mette Frederiksenip naalakkersuisoq Randi Vestergaard Evaldsen aatsitassat pillugit oqaloqatigisimavaa aammalu partiip illua'tungiliuttup siulittaasua Sara Olsvig oqaloqatigisimallugu kiisalu inuusuttunik suliniut Timi Asimi aamma oqaloqatigisimallugu. Tamatuma saniatigut Pinerluuteqarsimasunik Isumaginniffik, Unnerluussisussaatitaasut Politiillu oqaloqatigai. Ullumi ataasinngornermi Issittumi Sakkutooqarfik pulaassavaa.

Socialdemokratit siulittaasuata Nuummiinnermini aamma Ukkusissat qaqivaa.

Powered by Labrador CMS