Skip to main content

Mette F.: Naalagaaffeqatigiit nunanut allanut tunngasutigut politikkeqarnermi ataatsimut nipilimmik oqalussapput

Ministeriunerup naalagaaffeqatigiinneq ineriartortikkusullugulu, Kalaallit Nunaat Savalimmiullu nunanut allanut tunngasutigut politikki pineqartillugu sunniuteqarnerutikkusuppai. Qanorli ingerlarsortigisinnaanera killeqartoq, taanna erseqqissumik oqarpoq.

Ministeriunerup Mette Frederiksenip (Soc) aallaqqaammuulli oqaatigisarpaa, nunanut allanut tunngasutigut politikkeqarnermi Kalaallit Nunaat Savalimmiullu sunniuteqarnerutikkusullugit, kiisalu ataqatigiissaarisoqarnerusoqartarnissaanik kissaateqarluni.

Oqartussaaffiilli angerlaanneqarsimasut saniatigut nammineerluni nunanut allanut polikkernermi qanoq ingerlarsorsinnaatiginini killeqarnerarpaa. Tamanna folketingimi ullumi apeqqarissaartoqarnerani paasinarsivoq.

Ineriartortitsinissamik pisariaqartitsineq

Mette Frederiksen (Soc) Aki-Matilda Høegh-Damip (S) apeqqutaanut akissuteqarami naalagaaffeqatigiinnerup ineriartortinneqarnissaa pisariaqarsoraa

- Naalagaaffeqatigiinneq ukiut qulikkuutaat kingulliit ineriartorsimanerat qiviaraanni, malunnaateqarluartumik ineriartorsimavoq.

- Uannut paasissutissat qanoq annertutiginerat apeqqutaanngilaq. Naalagaaffeqatigiinneq uagut akisussaasut ullumikkutut inissisimalersillugu ineriartortissimavarput. Taamaammat ingerlalluarpoq piffissalu ingerlanerani ineriartussalluni, ministeriunerup Aaja Chemnitz Larsenip (IA) apeqqutaanut akissuteqarami oqarpoq.

Mette Frederiksenip (Soc) aammaarluni erseqqissaatigaa, naalagaaffeqatigiinnerup iluani nunat pingasut pineqartut naligiillutik suleqatigiinnissaat kissaatigalugu.

- Oqaluttuarisaaneq eqqarsaatigalugu ajunngitsunik ajortunillu tamatta kingornussaqarpugut. Siunissami suleqatigiinnissarput ullumikkullu naalagaaffeqatigiinnermi pissutsit eqqarsaatigalugit ataqqeqatigiinnissarput uanga isinni pingaarnerpaavoq.

Paasissutissat allanut tusarliuteqqusaanngitsut

Qitiusumik suliaqarfiit ilaat, suleqatigiiffiginerusutaa tassaavoq nunanut allanut tunngasutigut politikki. Tassai Kalaallit Nunaata Savalimmiullu maannamut sanilliullugu peqataatinneqarnerusalernissaat sulissutigineqarpoq.

Suliaqarfimmi ilaatigut mianernarsinnaasumi paasissutissanik allanut tusarliuteqqusaanngitsunik avitseqatigiittarnissamut najoqqutassaq sulissutigineqarpoq.

- Naalagaaffeqatigiinnermi pinngitsoorani ataatsimoorfiusussami pingaarutilinnik aamma avitseqatigiissinnaaneq pingaaruteqartut ilagaat.

Killissaq

Kalaallilli Nunaata nammineerluni nunanut allanut tunngasutigut polikkernera pineqartillugu Mette Frederiksen killiliisariaqarpoq.

- Tamatuma oqallisigineranut tunngaviusoq soorunami tassaavoq Tunngaviusumik inatsit, uangalu Tunngviusumik inatsimmik unioqqutitsinavianngilanga.

- Taanna tunngavigalugu inuuvugut, aamma taanna tunngavigalugu inatsisiliortarpugut.

- Nunanut allanut tunngasutigut politikki pineqartillugu pingaaruteqartoq tassaavoq, immikkoortitaarata naalagaaffeqatigiittulli oqaaseqartarnissarput, ministeriuneq erseqqissaavoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER