Mette F.: Kina nakkutigissavarput

Danmarkimi Folketingi ileqquusoq malillugu oktobarip qaammataani marlunngornermi siullermi ammarneqarpoq. Ministeriunerup Mette Frederiksenip ammaanersiorluni oqalugiarnermini Issittumi Kalaallillu Nunaanni sillimaniarnermut politikkikkut inissisimasoqarnera ilanngullugu oqaaseqarfigaa:

- Ruslandip Issittumi pissusilersornera malunnarnerulersimavoq. Aamma Kinap Issittumut atatillugu soqutigisai nakkutigissavavut.

- Taamaammat USA-p - Europami iligisat pingaarnersaata - pimoorussinerusumik suliaqartarnera takusinnaallugu nuannerpoq, Mette Frederiksen oqapoq, nangillunilu:

- Danmarkip Kalaallit Nunaat Savalimmiullu suleqatigalugit Issittumi sakkulersortoqannginnissaa ataatsimoorullugu anguniarpaa. Peqatigitillugu immitsinnut illersussaagut, ministeriuneq oqarpoq.

Ministeriunerup ilanngullugu oqaatigaa, internetsikkut saassunneqarsinnaanermut iliuuserisassat eqqumaffigineqarlutillu pisinnaasat annertusarneqartariaqartut.

Mette Frederiksenip attaveqartarnermut ataatsimiititaliaq nutaaq ataasinngornermi atuutsinneqalersoq aamma oqaaseqarfigaa. Ataatsimiititaliami nunat pingasut naalagaaffeqatigiittut nunanut allanut, illersornissamut sillimaniarnermullu politikki pillugit ataatsimeeqatigiillutillu oqaloqatigiittassapput:

- Danskit-Savalimmiormiut-Kalaalillu naalakkersuinikkut attaveqartarnermut ataatsimiititaliaannik pilersitsinissamut isumaqatigiissuteqarsimanerat nuannaarutigaara, ministeriuneq oqarpoq, nangillunilu:

- Sapaatip akunnerani qaangiuttumi matumanilu lagmandi Naalakkersuisullu Siulittaasuat malitseqartitsisumik oqaloqatigisimavakka. Suliassat atsioqatigiissutigeqqammerpavut.

- Marluullusi ullumikkut Folketingimiippusi. Periarfissarlu atorlugut tigussaasumik suleqatigiilluarsimanitsinnut qujaffigerusuppassi, ministeriuneq Folketingimi atlantikup avannaanersutut ilaasorta suleqataasimanerannut aamma qujassuteqartoq oqarpoq.