Mette F. meeqqat misiliutaasimasut pillugit suliamut ilanngunneqaqqippoq

- Ministeriuneq meeqqat misliutaasimasut sinnerinut eqqartuussivikkoortitsinngikkaluarluni taarsiissuteqarniarpa, IA sinnerlugu folketingimi ilaasortap Aaja Chemnitz Larsenip socialdemokratit ministeriutitaannut Mette Frederiksenimut toqqaannartumik apeqqutaa taamatut nipeqarpoq.

Aaja Chemnitz Larsenip neriuutigaa, meeqqat misiliutaasimasut eqqartuussivimmut sassartitsissagaluarunik intsisitigut aporaattoqarsinnaaneranik pinngitsoortinneqassasut, suliarlu alla assingusoq, naalagaaffiup taarsiissuteqarnissaq pillugu isumaqatigiissuteqarsimanera eqqaasissutigalugu.

Inatsisitigut akisussaaffeqarneq

- Naalakkersuisut kingullermik inatsisitigut akisussaaffeqarnertik takutissimavaat, tassa Naalakkersuisut nukappissat Godhavnimeersut pillugit suliami assingusumi taarsiissuteqarnissaq pillugu isumaqatigiissuteqaramik. Isumaqatigiissuteqartoqarneratigut suliat eqqartuussivikkoortitsinngikkaluarluni naammassineqarsinnaasimapput, Aaja Chemnitz Larsen allappoq.

- Nukappissanut Godhavnimeersunut taarsiissuteqarnerup takutippaa utoqqatserneq naammanngitsoq, taamaammallu aningaasatigut taarsiissuteqartoqartariaqarluni, Aaja Chemnitz Larsen tunngavilersuivoq.

1951-imi meeqqat 22-t isumaginninnikkut misiliutissatut Danmarkimukartinneqarput, taakku danskisut ilinniartinneqariarlutik inersimasunngorunik Kalaallit Nunaanni nutaaliaasumi ineriartortitsinermut sunniuteqartussatut siunniunneqarsimapput. Miliinerli kissaatigisamit allaanerulluinnartumik kinguneqarsimavoq.

Arfinillit kisinngorussimasut

Meeqqanit misiliinermut peqataasimasunit 22-usunit ullumikkut arfinillit kisimik suli inuupput. Utoqqatsertoqarnissaanik ukiuni arlalinni piumasaqartoqartareersoq aamma annertuumik qulaajaasoqareersoq Danmark siorna decembarip qaammataani meeqqanut pisortatigoortumik utoqqatserpoq – Danmarkiliartinneqarnerannit ukiut 69-it qaangiunneranni.