Skip to main content

Mette F.: Kalaallit Nunaata ajornartorsiutit nammineq aaqqinniassavai

Danmark ikiuussinnaavoq, Kalaallit Nunaatali nammineerluni inuiaqatigiinni atugarliortut atugarisaat pitsanngorsarniassavai, taanna oqarpoq

Partiip illua'tungiliuttup siulittaasuata Mette Frederiksenip pisortatigoortumik Kalaallit Nunaannut tikeraarngaarnermini neriuutigaa nuna paasisaqarfiginerussallugu.

Socialdemokratit siulittaasuat sapaatip akunnerani kingullermi tallimanngormalli nunatsinni angalavoq, Naalakkersuisut illua'tungiliuttullu pulaarlugit inuinnaallu naapittarlugit.

Inuiaqatigiit marluk

– Nassuerutigisariaqarpoq inuiaqatigiit marluusut imminnut assigiinngitsorujussuit. Qallunaatut aalajangiisartutut nuna tikeraarneqartariaqarpoq periarfissat, aammattaarli unammilligassarujussuit, paasisinnaajumallugit, Mette Frederiksen Nuummiilluni oqarpoq.

Taassuma naalagaaffeqatigiit avannarlersaannut tikeraarnermini ilaatigut sammivai Kalaallit Nunaata unammilligassarpassui.

Ilaatigut suliffissaaleqinerup akiorniarnera isumaginninnikkullu ajornartorsiutit. Imminut toquttartut suli amerlaqaat, imigassamik atornerluineq atugaaqaaq, meeqqanik kinguaassiuutitigut atornerluinerit nakuusertarnerillu. Tamatuma saniatigut inuusuttut ilinniariarlutik aallartarput uteqqissanatillu.

Unammilligassat

– Nunami aningaasarsiornerup aalajaannerusumik ineriartortinnissaa qulakkeerniarlugu unammilligassaqarpoq. Naalakkersuisunillu tusagara, tassa aningaasarsiornikkut ineriartorneq arlalitsigut ingerlanniarneqassasoq, ilalernartittorujussuuvara.

– Tassa imaappoq, aalisarneq, pingaarutilimmik isertitsiffiusartoq, suli siuarsarneqassaaq. Piiaaffinnik ingerlatsineq aatsitassarsiornelru kiisalu takornariaqarneq tapersersorneqassapput, inuussutissarsiutitut pingaarnertut pingasutut, Mette Frederiksen oqarpoq.

Kalaallit Nunaata siunissaanut aalajangiisuulluinnarpoq aningaasarsiornermik atasinnaanerusumik pilersitsinissaq suliffissaaleqinerullu akiorneqarnissaa, taanna isumaqarpoq.

Suleqatigiinneq nukittunerusoq

Kalaallit Nunaanni ajornartorsiutit nunap nammineq aaqqinniassavai namminrsornermut aaqqissuussineq naapertorlugu, Danmarkili ikiuussinnaavoq, taanna oqarpoq.

– Kalaallit Nunaanni isumaginninnikkut ajornartorsiutit annertuvallaaqaat. Minnerunngitsumik meeqqanut tunngasuni unammilligassarujussuaqarpoq, neriuppungalu taumatumani suleqatigiinneq nukittunerulissasoq, tassami pineqarmata meeqqat, maannakkorpiaq ikiorneqarnissaminnik pisariaqartitsisut, taanna oqarpoq.

/ritzau/

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER