Mette F-ip Nunatta sila pillugu isumaqatigiissummut ilanngunnera alloriarnertut annertuutut isigaa

Kalaallit Nunaata Parisimi isumaqatigiissummut, FN-ip sila pillugu nuarsuarmi isumaqatigiissutaanut ilanngunnera "ajunngilaq, ajunngilluinnarpoq". Danmarkimiillu isumaqatigiissummi anguniakkat Kalaallit Nunaat peqatigalugu anguneqarnissaat qilanaarineqarpoq.

Ministeriuneq Mette Frederiksen (S) marlunngornermi taamatut oqarpoq.

- Naalagaaffeqatigiinnut tamanna annertuumik alloriarneruvoq, aamma silap pissusaanut atatillugu nunarsuarmi anguniakkanut tamanna pingaaruteqarluinnartuuvoq.

- Kalaallit Nunaat silap pissusaata allanngoriartorneranit nunat sunnerneqarnerpaat ilagaat, Mette Frederiksen oqarpoq.

2022-mi upernaakkut ilaalernissaq naatsorsuutigineqartoq

Naalakkersuisut ataasinngornermi ilisimatitsissutigaat, Kalaallit Nunaata nunatut nangaassuteqarnera Parisimi isumaqatigiissummi atorunnaarsinneqarnissaa aalajangiunneqarsimasoq, Kalaallit Nunaat isumaqatigiissummut ilanngussinnaaqqullugu.

Naalakkersuisut Siulittaasuata Múte B. Egedep Glasgowimi COP26 pillugu ataatsimeersuartoqarnerani, marlunngornermi tusagassiortunik katersortitsisoqarmat, aalajangersimaneq pillugu allakkat pisortatigoortumik Mette Frederiksenimut tunniuppai.

Naalakkersuisut Siulittaasuata oqaatigaa, Kalaallit Nunaat Parisimi isumaqatigiissummut ilanngunnermini silap pissusaata allanngoriartorneranut akiueqataaniartoq.

- Issittumi najugaqartuusugut silap pissusaata allanngoriartornera nunarsuarmi nunanut allanut sanilliulluta sukkanerusumik malugisarparput. Akisussaaffitsinnik tigusiniarpugut, Múte B. Egede oqarpoq.

Kalaallilli Nunaat nunarsuarmi silap pissusaanut atatillugu isumaqatigiissummut pisortatigoortumik ilanngutsinnagu pissutsit arlallit ininneqaqqaartariaqarput. Múte B. Egedep naatsorsuutigaa, 2022-mi upernaakkut isumaqatigiissummut ilaalertoqassasoq.

Siulittaasoq nunamik minguinnerusumik ingerlatsiniartoq

Tamatuma kingornatigut nunat 2015-imi isumaqatigiissummut atsioqataasimasut arlallit assigalugit Kalaallit Nunaata nunatut silamut atatillugu anguniakkani saqqummiutissavai.

Naalakkersuisut Siulittaasuata isumaqatigiissummut ilanngunniarneq ataasinngornermi oqaluttuarigamiuk neriorsuutigaa, Kalaallit Nunaat annertuunik anguniagaqarniartoq. Sorpiaalli anguniarneqarniarnersut itinerusumik oqaluttuarinngilai.

Múte B. Egedep ukioq manna siusinnerusukkut nunami pissaanermik tigusigami Kalaallit Nunaat minguinnerusumut ingerlatilersimavaa.

Ilaatigut Kalaallit Nunaanni Naalakkersuisut siulittaasuattut aalajangersimavoq, Kalaallit Nunaanni uuliasiortarneq unitsinneqassasoq.

Tassunga taarsiullugu nukinnik ataavartunik, soorlu erngup nukinganik nukissiorfinnik atuinerusoqarnissaa nittarsaassisoqartarnissaalu siuarsarniarlugit suliniuteqarsimavoq.