Mette F. ammaanersiorluni oqalugiarnermi: Danmarkip Kalaallit Nunaat itisuunik ikilersimavaa
Folketingi ileqquusoq malillugu oktobarip qaammataani marlunngornermi siullermi ammarneqarpoq. Ministeriunerup Mette Frederiksenip ammaanersiorluni oqalugiarnermini Danmarkip nunasiaateqarsimanera ilanngullugu oqaluuseraa.
Ministeriuneq Mette Frederiksen (Soc.) tusagassiorfinnit malinnaaffigineqarluarlui marlunngornermi ileqquusoq malillugu Folketingimi ammaanersiorluni oqalugiarpoq.
Ministeriunerup oqaaseqarnermini oqaatigaa Danmarki Kalaallit Nunaannut Savalimmiunullu tutsuiginartumik suleqataasoq, tamatumalu kingornatigut Danmarkip nunasiaateqarsimanera pillugu oqaaseqarluni:
- Danmarki nunasiaateqartuusimavoq. Tamatumunngalu atatillugu minnerunngitsumik Kalaallit Nunaat itisuunik ikilerneqarsimalluni.
- Ikit ilaat uagut danskiusugut paasiuminaatsittarsimavagut, pisimasulli tammartissinnaanngilagut, ministeriuneq Folketingip oqaluttarfianiit oqarpoq.
Ministeriuneq: Naligiinnerusumik suleqatigiinneq
Mette Frederiksenip ministeriunerunerani ilaatigut kalaallit meerartaat 22-t 1950-ikkut aallartinneranni misileraatitut Danmarkiliartinneqarsimasut utoqqatserfigineqarput.
Mette Frederiksenp ilanngullugu oqaatigaa, naalagaaffeqatigiit suleqatigiinnerat nammineq ministeriunerunermi nalaani pitsaanerulersimasoq isumaqarluni:
- Ulølumikkut Savalimmiut, Kalaallit Nunaat Danmarkilu imminnut ataqqeqatigiillutik naligiinnerusumik suleqatigiilersimapput. Nunani taakkunani pingasuni naalakkersuisut ataqatigiissaakkamik ataatsimeeqatigiittalersimapput - minnerunngitsumik illersornissamut, nunanut allanut tunngasutigut sillimaniarnermullu politikkit oqaluuseriniarlugit.
Qinersisoqarnissaa nallingajalersoq
- Naalagaaffeqatigiit pissutsini nutaani sumiissusersinissamut periarfissagissaarnerulersimapput, tassani nunat assigiinngitsut imminnut sunniuteqaqatigiittarnerat silatitsinni takusinnaavarput aamma arlaalluunniit tuniniagaanngilaq, Mette Frederiksen oqarpoq.
Arlaalluunniit tuniniagaanngitsoq pillugu oqaatsimi Amerikamiut præsidenterisimasaasa Donald Trumpip 2019-imi præsidentiunermini pisiaqarusussimanera innersuussutigineqannguatsiarpoq.
Ministeriunerup oqaaseqarnermini arlaleriarluni oqaatigisarpaa, piffissami qaninnermi Folketingimut qinersisoqartussaasoq. Radikale Venstremit Mette Frederiksenimut piumasarineqarsimavoq, sisamanngornermi qinersisoqarnissaanik nalunaaruteqassasoq, taamaanngippat ministeriunermut tatiginnikkunnaarneq naalakkersuisunillu uppisitsinissaq partiimit anguniarneqassammat.