Mette aamma Múte GUX-imi apeqqarissaarfigineqartut
Ukraine, peqqinnissaqarfimmi neqeroorutit aamma Issittoq pillugu Siunnersuisoqatigiinnut tunngatillugu ministeriuneq Mette Frederiksen aamma Naalakkersuisut siulittaasuat Múte B. Egede GUX-imi ilinniarnertuunngorniartunit apeqqarissaarfigineqarput.
Ministeriuneq Mette Frederiksen aamma Naalakkersuisut siulittaasuat Múte B. Egede GUX-imi inuiaqatigiilerinermik ilinniartunit Ukrainemi sorsuttoqarnerani alloriarnissap tullianut tunngatillugu apeqqarissaarfigineqarput.
Naalakkersuisut siulittaasuat nunatsinnut tunnganerusunut, soorlu imminut toqunnissamik eqqarsaateqartunut iliuusissanik aamma suiaassutsip allanngortinnissaanut pilatsittoqartarsinnaaneranut apeqqarissaarfigineqarportaaq.
Ilinniartut soqutiginnilluinnartut eqimattakkaarlutik issiapput, ataasiakkaarlutillu apeqquteqartarlutik. Apeqqutit akinnginnerini Mette Frederiksen arlaleriarluni apeqqutit pitsaassusaat pillugit ilinniartut nersualaarpai.
Ukraine oqaluuserineqarpoq
Nunarsuup sinneratuulli, GUX-imi ilinniartut Ukrainemi pisunut maanna malinnaapput. Sorsunnerup siunissami unissimalernerata kingorna naalagaaffeqatigiit Ruslandimut niueqqilissanersut pillugu aperisoqarpoq.
- Issiaannartoqarsinnaanngilaq oqarlunilu sorsunneq unippat soorlu susoqarsimanngitsoq. Maannakkorpiaq Ruslandimut pillaatinik kinguneqartitsivugut. Qanoq naammassiumaarnersoq, tamassumallu kingorna qanoq pisoqarumaarnersoq maanna oqaatigisinnaanngilara, Mette Frederiksen oqarpoq.
- Ruslandimut kinguneqartitsivugut, maannalu politikkeraarput Ruslandimut niuertoqassanngitsoq. Maanna sakkortuumik aaqqiagiinngittoqarpoq, nunallu nammineertut saassunneqartillugit uagut aamma ataqatigiittariaqarpugut, Múte B. Egede pissutsit pillugit oqaaseqarpoq.
Imminut toquttarnerup akiornissaanut iliuusissaq naak
Apeqqutit arlallit Ukrainemi sorsuttoqarneranut aammalu Issittoq pillugu Siunnersuisoqatigiinnut tunngagaluartut, ilinniartut allanik nunatsinnut tunnganerusunik aamma apeqqutissaqarput.
Ilinniartut ilaat oqaluttuarpoq nalunngisaqarluni imminut toqunnissamik eqqarsaateqarluni peqqinnissaqarfimmut saaffiginnikkami angerlaqquinnarneqarsimasoq, apeqqutigalugulu imminut toqunnissamik eqqarsaateqartut naalakkersuisunit qanoq pitsaanerusumik ikiorniarneqalersaarnersut.
- Siullermik oqaatigissavara imminut toqunnissamut aarlerinaateqartoq ikioqqusoq ikiorneqarsimanngippat kukkunerusoq akuerineqarsinnaanngitsoq. Imminut toquttarnerup akiorneqarnissaanut periusissiamik maanna suliaqarpugut, inuusuttut imminut toqunnissamik eqqarsaateqartut ikiorluarneqarnissaannik iluaqutaasussamik, Múte B. Egede oqarpoq.
Minutsini 45-ni anitsiarneq
Ministeriunerup tikeraarnerani pilersaarutit angumeriniagassat arlaqarmata apeqqarissaarneq sivikillineqarsimavoq. Minutsinili 45-ni apeqqarissaartoqarnerani apeqqarissaartut soqutiginnilluarmata piffissaq sukkasuumik ingerlavoq.
Ilinniartut ilaasa naalakkersuisut siulittaasuat immikkut maluginiagaqaqquaa. Suiaassutsiminnimmi allannguerusullutik pilatsikkusuttut nunatsinni periarfissaqanngillat, taamatullu Danmarkimi suliaritissagunik angalaneq, najugaqarneq, napparsimmavimmiinneq, suliaritinneq piareersaatillu tamaasa namminneerlutik akilertariaqartarpaat.
- Siullermik oqarusuppunga assigiinngisitaartuuneq naalakkersuisunit inissaqartinneqarusuppoq. Taama oqareerlunga piviusut qiviassagutsigit, taama nakorsaanissami immikkut ittunik ilisimasalinnik nakorsanik amigaateqarpugut, nunatsinniinnaanngitsoq aammali Danmarkimi. Assigiinngisitaartuunerulli paasiartornerani aaqqiissutissanik immaqa nassaartoqarsinnaanera neriuutigineqarsinnaavoq, Múte B. Egede oqarpoq.
Kalaallit Danmarkimi najugaqartut immikkoortitaallutik akerartungaasarnerat, suliassaqarfiit angerlaanneqartussat nunattalu Folketingimi ilaasortaatitaasa amerlassusaat pillugit apeqqarissaarnermi aamma aperisoqarpoq.