Meqqukkaavaraq Nuummi nassaarineqartoq
Nuummi innuttaasut apummi aasiammik angisuumik ingerlaartumik takugamik assilipallappaat. Taanna aasiak Aasiak sineriammiumik ateqarpoq, Nunatsinnilu nalinginnaasorujussuulluni.
Sermitsiaq.AG-ip attavigisaanni aasiak 2 centimeterit missaanik angissuseqarpoq apummilu angalaalluni.
- Aasiak taanna aasiak sineriammiuugunavippoq. Taanna Kalaallit Nunaanni nalinginnaasorujussuuvoq ukiukkullu illup iluani takuneqarsinnaasarluni, pinngortitaleriffimmi ilisimatooq Henrik Lund Sermitsiaq.AG-mut nassuiaavoq nangillunilu:
- Kalaallit Nunaanni illup iluaniittartunik aasiaqartarpoq, kisianni assimiittut qanillitigineq ajornarsinnaapput aamma taama meqqoqartigineq ajorput. Aasiallu illup iluaniittartut apummukarunnanngillat, Henrik Lund oqarpoq.
Sermitsiaq.AG-mut paasissutissiisoqarpoq meeqqat atuarfiani atuartoq aasiaat pingasut meqqukkaat angerlariartornermini takusimallugit. Tamannalu ilaquttaminut eqqumiigalugu oqaluttuarisimallugu.
Qaqqami nalinginnamik uumavoq
Kalaallit Nunaata uumasui pillugit leksikonip allaaserisai naapertorlugit nalinginnarmik aasiak taaanna sumi qaqqami uumasuuvoq. Taannalu sullinernik, aasiannik allanillu uumasuaqqanik piniartarpoq. Aasiak sineriammiu qassutinik piniarneq ajorpoq piniakkanilu pangalilluni piniartarlugit.
- Aasiallu ilisarnaatigai, taartuupput meqqulerujussuit isaat tunuleriit pingasuullutik. Titarniisalinnik nioqarput, kiatimik qeqqatigut saneraatigullu qaamanersaqarlutik 3-4-nik milalinnik, taama Kalaallit Nunaata uumasui pillugit leksikonimi paasissutissiipput.
