Mekanikkip ajoquteqarneranit akunnittarfissaq ikuallasersimasoq
Ilulissani akunnittarfiliarineqartup ikuallalersimaneranut mekanikkip ajoquteqarnera pissutaasimavoq. Kalaallit Nunaanni Politiit sapaatip akunnerani misissuinerminni tamanna paasisimavaat.
Pinerluttoqarsimatillugu misissuisartut paasisimavaat, sapaammi martsip arfineq-aappaanni Ilulissani ikuallatsitsisoqarsimanngitsoq.
Ilulissani akunnittarfissaq sapaammi martsip arfineq-aappaanni nalunaaqutaq 20.12 politiinut nalunaarutigineqarpoq, nalunaaquttallu akunnialuisa ingerlaneranni qaminneqarluni. Ikuallattoqarmat inunnik ajoqusertoqarsimanngilaq.
Kalaallit Nunaanni Politiit tusagassiorfinnut nalunaaruteqarnerminni ilisimatitsissutigaat, pinerluttoqarsimatillugu misissuisartut Danmarkimeersut Kalaallit Nunaanni Politiit misissuinerannut ikiuussimasut.
Takunnissimasut apersorneqarsimasut
- Misissuisoqarmat paasineqarsimavoq, mekinikkikkut ajoquteqartoqarnera ikuallannermut pissutaasimasoq, tamannalumi politiit sanasunik sanatitsisunillu apersuisimanerannut naapertuulluni. Kalaallit Nunaanni Politiit ikuallatsitsisoqarsimaneranik pasitsaassaqarnissamut tunngavissaqarsorinngilaat, taamaammallu suliaq unitsinneqarluni, politiinit oqaatigineqarpoq.
Politiit taarsiissuteqrtoqarsinnaanera eqqarsaatigalugu mekanikkikkut qanoq ajoquteqartoqarlersimanera erseqqinnerusumik oqaatigerusunngilaat, politiit Sermitsiaq.AG-mut ilisimatitsipput.
Politiit misissuinertik naammassivaat, misissuisinermilu paasisat sanatitsisunut akunnittarfiutilinnullu tunniunneqarlutik.
Akunnittarfissaq Ilulissat illoqarfiata qeqqaniittoq tallimanik quleriiusoq 78-inik ineerartaqarnermi saniatigut ataatsimiittarfeqarlunilu neriniartarfeqartussaavoq. Akunnittarfik upernaami ammarneqartussaagaluarpoq.