Meerartaarsinnaanngitsut akerliussutsimik takutitserusuttut

Meerartaarsinnaanngitsut akiliullugit Danmarkimut nakorsartikkiartortarnerat unitsissallugu Naalakkersuisut aalajangernerat pillugu meerartaarsinnaanngitsut akerliussutsimik takutitserusupput.

Meerartaarneq akisusaqaaq. Meeqqamut atortussat, atisat nangillu pisiarineqartariaqartarput. Piumasarinngisamilli meerartaarsinnaanngitsunut tamanna akisunerujussuanngorpoq.

Piumasarinngisaminnik meerartaarsinnaanngitsut nunatsinni nakorsartillutik naartulersinnaanngikkunik, nakorsartikkiartornissamut atatillugu Danmarkimut angalanertik najugaqarnertillu namminneerlutik akilertaraluarpaat. Maannali Danmarkimi nakorsartinneqarnissaq aamma namminneerlutik akilertalissavaat. Tassa meerartaarnermi aningaasartuutit, soorlu aneerussivissinerup atisaararsinerullu saniatigut, allanik aningaasartuuteqartalissapput.

Tamanna ajorpoq, Ivalo Frank Larsen isumaqarpoq.

- Nalinginnaasumik naartulersinnaanani sakkortoorujussuuvoq. Misigissutsit sakkortusaqaat. Meerartaarsinnaannginnermi nakorsartinnermut atatillugu nammineq akiliisalernissaq ajorluinnarpoq, oqarpoq.

Aalajangerneq pillugu akerliussutsimik takutitsissalluni maanna pilersaarusiorpoq, pilersaarusioqataasinnaasumillu ujaasilluni. Taassuma ilisimatitsissutigaa qaqugu akerliussutsimik takutitsisoqarnissaa suli aalajangerneqanngitsoq, qaammatilli matuma naannginnerani akerliussutsimik takutitsisoqarumaartoq.

Nujaarutilerneq aliasunnerlu

Ivalo Frank Larsen meerartaarsinnaanngilaq. Siornatigut naartulertarsimagaluarpoq, illialli paavatigut naartusarnerup kinguneranik mannissaqarfiinit aqqutaasut pilaanikkut peerneqarsimallutik. Naartulersinnaannginnerup iluatsinngitsumillu naartusarsimanerup kinguneranik tarnikkut ilungersorsimavoq, tamatumalu kingorna nujaarunnersaqalersimalluni.

Ivalo Frank Larsen Kalaallit Nunaanniit Danmarkimi Rigshospitalimi IVF atorlugu naartulernissaq siunertaralugu nakorsartinneqarnissamut innersuunneqartut kingulliit ilagaat. Tassa nakorsartinninni akilissanngilaa. Nakorsartinnerit marluk kingulliit iluatsissimanngillat, naggataasumilli suli misileeqqissinnaalluni.

- Danmarkimut aallangajalerpugut. Peqqinnissaqarfiup nakorsartinnermut akiliutit suli unitsinngikkaat nakorsartinnissamut neqeroorfigineqarpugut, nassuiaavoq.

Taassuma erseqqissarpaa kikkut tamarmik, nammineq periarfissaqartitaasimanermisulli, assigiimmik periarfissaqartariaqartut.

- Naartulersinnaanani ilungersunartorujussuuvoq. Namminersorlutik Oqartussat Danmarkimi nakorsartinnerit taama ittut akilersinnaanngippagit, nalinginnaasoq aqqutigalugu meerartaarsinnaanngitsut naartulernissaminnut periarfissaqarpallaarunnaassapput, akisunermut, oqarpoq.

Powered by Labrador CMS