Meerarpassuit kinguaassiuutitigut atornerlunneqarsimasut misissorneqarneq ajortut

Nunatsinni meeqqat kinguaassiutitigut atornerlunneqarsimasut nakorsamit misissorneqarneq ajorput. Tamanna meeqqamut atornerluisimasumullu uppernarsaatinut kingunerluuteqarsinnaavoq

Aviâja Egede Lynge

Nunatsinni sumiiffinni amerlasuuni meeraq kinguaassiutitigut atornerlunneqarnermi kingunerisaanik nakorsamit misissorneqarneq ajorpoq. Tamanna MIO-mit meeqqat illersuisuata, Aviâja Lyngep suleqatinilu nunatsinni sumiiffiit 40-t tikeraareerlugit uparuarpaa.

KNR allappoq.

- Meeqqat nunatsinni kinguaassiutitigut atornerlunneqarsimasut nunatsinni sumiiffinni tamani peqqinnissaqarfimmit misissorneqartannginneri assut aarlerinarpoq, Aviâja Lynge KNR-imut oqarpoq.

eeraq kinguaassiutitigut pinerliffigineqarpat taava meeraq nakorsamit erngertumik misissorneqassaaq. Tamanna meeqqamut timikkut innarlerneqarsimasinnaasumut ikilerneqarsimasinnaasumullu ikiuiniarneruvoq . Nakorsaq aamma tarnip pissusaatigut ikiorserneqarnissamut innersuussisinnaavoq, tassa tamanna pereersimanngippat.

Uppernarsaat pingaarutilik

Tamatuma saniatigut meeqqap misissorneqarnera atornerlunneqarsimaneranik takussutissanik uppernarsaataassaaq. Meerarli nakorsamit misissorneqanngikkaangami pinerluttumut uppernarsaatit innarlerneqartartut, Aviâja Lynge KNR-imut erseqqissaavoq.

- Uppernarsaatissaqanngikkuni tamanna eqqartuussivimmi suliami atorneqarsinnaanngilaq. Taamaammat tamanna isornarniarnartorujussuusoraara, Aviâja Lynge oqarpoq.

Politiit uppernarsarpaat: Meeqqat ikittuinnaat misissorneqartarput
Politiit peqqinnissaqarfimmit inummut misissueqqusisinnaapput - aamma eqqartuussinermi atorneqartussamik meeraq atornerlunneqarsimasoq misissoqqusinnaavaat . Tamannali atornerluinerup politiinut aatsaat nalunaarutigineqareernerani pisinnaavoq .

Tamannali ”suliani ikittuinnarni” pisartoq, Kalaallit Nunaanni Politiini politikommissærip tullia, Rune Nielsen oqarpoq. Tamanna amerlasuutigut kingusinaareersimasarpoq.

- Kinguaassiutitigut atornerluinermit kingusinnerungaatsiartumi amerlanertigut aatsaat nalunaaruteqartoqartarpoq. Meeqqamiillu paasissutissat amerlasuutigut sivikitsuinnarmik atasarput. Uppernarsaatissallu tammartarlutik, Rune Nielsen oqarpoq.

Meeqqamik kinguaassiutitigut atornerluisoqarnerani timikkut paasissutissanut atatillugu sukkasuumik – ajornanngippat ullut ikittuinnaat qaangiunneranni iliuuseqartoqassaaq .

- Ukiukinnerugaangamik sukkanerusumik mamittarput. Taamaammat meeqqamit uppernarsaatissat amerlanertigut tammarsimasarlutik .

Meeqqat kinguaassiutitigut atornerlunneqarneranit pingaarutilinnik paasissutissarsinissamut periarfissaqarsinnaagaangat politiit misissueqqusisartut, Rune Nielsenip erseqqissaatigaa.

- Sukkanerpaamik iliuuseqartussaavugut. Inuullu misissorneqarnera uppernarsaatissarsisitsisinnaassanersoq qularigaangatsigu taamaaliortarpugut, Rune Nielsen oqarpoq.

Nakorsap misissuinera meeqqamut aamma sakkortusinnaavoq.
Naak meeqqap timaanit paasissutissat uppernarsaateqarnissamut pingaaruteqaraluartut, politiit napparsimaveqarfiullu tungaanniit aamma isumaliutissaqarpoq.

Video atorlugu apersuisarneq

Meeqqap kinguaassiutitigut ilaatigut misissorneqarnera meeqqamut sangeereersumut atornerlunneqaqqinnertut ukiukitsumut misiginarsinnaavoq. Derfor tager domstole også videoafhøringerne af børn som et tungt bevismateriale, fortæller Rune Nielsen.

- Taamaammat eqqartuussiviit meeqqat videoliut atorlugu apersorneqarnerat uppernarsaataalluartutut isigisaraat. Videoliut atorlugu apersuineq uppernarsaatitut pingaaruteqartorujussuuvoq. Meeqqallu inuttut misissuinnginnermi video atorlugu apersorneqarnissaa amerlanertigut kissaatigisarparput, pissutigalugu kinguaassiutitigut atornerluineq misissuinerlu meeqqamut ataatsimoortinneqalersinnaasarmata .

Video atorlugu apersuisoqarnissaa nakorsap misissuisinnaanerata pinnginnerani pinissaa pissutigalugu kinguaassiutitigut atornerluinerit – atornerluisumilluunniit pasitsaassaqarnerit piaartumik nalunaarutigineqarnissaannut suli pingaarnerutitsivoq .

Suliniut nutaaq

Politiit suliniutertik nutaaq saqqummiuteqammerpaat, suliniut aqqutigalugu meeqqat inersimasullu kaammattorneqarput meeqqamik kinguaassiuutitigut atornerluisoqarsimatillugu nalunaaruteqartarnissamut – ullumikkumiit sukkanerujussuarmik pisarnissaa kaammattuutigineqarluni.

- Nalunaarutiginnittarnermut aporfinnut iliuuseqarfigisatsinnut soqutiginnippugut. Kinguaassiutitigut atornerluisoqarneranit nalunaarutiginnittarnermut piffissaq sukkanerulersikkusupparput, Rune Nielsen oqarpoq.

Powered by Labrador CMS