Meeraq arfinilinnik ukiulik alianartumik toqusoq
Meeraq maajip naanerani nalinginnaasumik suliarineqareernerup sunniutaanik pissuteqartumik sapaatip akunnerata naanerani ajoqusersimasut nakorsiartarfianni toquvoq. Suliaq politiinit Nunattalu Nakorsaaneqarfianit suliarineqarpoq.
Meeraq arfinilinnik ukiulik arfininngornerup unnuaani Dronning Ingridip Napparsimmavissuani Nuummi alianartumik pisoqarneratigut toquvoq.
- Sapaatip akunnerata naanerani toqusoqarsimanera uppernarsarsinnaavara. Suliaq politiinit Nunattalu Nakorsaaneqarfianit malittarisassat malillugit suliarineqarpoq, Peqqinnissaqarfimmi pisortaq Tina Amundsen oqarpoq.
Sermitsiaq.AG suliaq pillugu itinerusumik apersuinissamik sulissuteqarpoq.
Nalinginnaasumik suliarinninneq
Kalaallit Nunaanni Politiit meeqqat arfininngornerup unnuaani Dronning Ingridip Napparsimmavissuani toquneranik suliaq tigusimallugu ilisimatitsipput.
Meeraq maajip naanerani neqaajartippoq – tonsillektomimik taaneqartartoq. Tonsillektomi tassaavoq pilattaanikkut neqaajartinneq. Naak tonsilletktomi siornatigumut sanilliullugu qaqutigut pisaraluartoq, Sundhed.dk naapertorlugu suliarinnittarnerit nalinginnaanerpaat suli ilagaat.
Sermitsiaq.AG-p paasissutissaatai naapertorlugit ilaqutariit tallimanngornermi Sanamut attaveqarput, meeqqap anniarnera pissutigalugu, kisianni aqaguani aggissasut nalunaarfigineqarput.
Arfininngornermi ullaakkut piffissamik tunineqartut
Ilaqutariit peqqinnissaqarfimmut attaveqarnertik pissutigalugu arfininngornermi ullaakkut nalunaaqutaq 9.00 piffissamik tunineqarsimasut, politiit ilisimatitsipput, tamannali kingusinaarpoq.
Qaniani ammasumik aanaarneq pissutaasimasoq, toqusumik misissuinerup takutippaa, Kalaallit Nunaanni Politiit taama ilisimatitsipput.
Danmarkimi ukiumut tonsillektomimik suliarinninnerit 7.000-t missaanniittarput.
