Meeraq angerlarsimaffeqanngitsoq Marokkomeersoq Kalaallit Nunaanni politiinit unitsinneqartoq
17-inik ukiulik Danmarkimit Kalaallit Nunaannut isertorluni ilaasimavoq. Taanna Canadaliarniarunaraluarpoq. Berlingske taama allaaserisaqarpoq.
Nukappiaraq 17-inik ukiulik Marokkomeersoq umiarsuarmut takornariartaammut Norgemeersumut isertorluni ilaalluni Kalaallit Nunaannut tikissimavoq. Taannali politiinit unitsinneqarpoq, Danmarkimilu Center Sandholmimut utertinneqarluni. Berlingske taama allaaserisaqarpoq.
Nuummi politiit aamma Berlingskemut ilisimatitsissutigaat, septembarimi 2016-imi marokkomeersoq 17-inik ukiulik Kalaallit Nunaanni unitsinneqarsimasoq, taannalu umiarsuarmik takornariartaammik Norgemeersumut ilaalluni tikissimasoq.
17-inik ukiulik nunamut qimaasutut isernissamik qinnuteqartuunersoq imaluunniit Danmarkimi itigartitaasimanersoq nalunarpoq. Aammalu Danmarkimit Kalaallit Nunaannut qanoq angalasimanersoq nalunarluni.
Meeqqat angerlarsimaffeqanngitsut Marokkomeersut siornatigut ikaartaammik Hirthalsimit Savalimmiunukartartareerput. Berlingskep paasisaat naapertorlugit Canadaliarniartarput.