Meeraanerminni misileraataasimasut Ilulissanut tikingajalerput - innuttaasunut oqalugiaateqassapput
Ilulissat Kangiata Illorsuanut katersugaasivimmullu aamma pulaassapput. Meeraanerminni misileraataasiamsut sinneri ullumikkut suli inuusut arfiniliullutik tamarmik angalaqataassasut, borgmesteri oqaluttuarpoq.
Danmarkimi ministeriuneq martsip qaammataani meeraanerminni misileraataallutik 1951-imi Danmarkiliartinneqarlutik qallunaatut inuuneqalersinniarneqarsimasut sinnerinut arfiniliusunut utoqqatserpoq.
Tamtuma kingunitsiannguatigut Avannaata Kommuniani kommunalbestyrelsi aalajangerpoq, meeraanerminni misileraataasimasut Ilulissani misigisassarsiortinniarlugit qaaqquneqassasut.
Borgmesterip Palle Jerimiassenip Sermitsiaq.AG-mut ilisimatitsissutigaa, angalaffissat maanna inissinneqarsimasut, tikeraallu juulip pingajuaniit qulingiluaanut Ilulissaniissasut. Meeraanerminni misileraataasimasut sinneri arfinillit tamarmiullutik pingasunik ingiallorteqarlutik angalaqataassapput.
- Allattoqarfimmi sinniisuutitaq peqatigalugu timmisartoqarfimmut nammineerlunga aassavakka, Jerimiassen oqarpoq.
Sermermiuni oqalugiassasut
Meeraanerminni misileraataasimasut ilaatigut illoqarfiup katersugaasivianut, Ilulissat Kangiata Illorsuanut pulaassaapput Ilulissallu Kangerluani angalaassallutik.
Aamma tamanut ammasumik aaqqissuussisoqarsimavoq, innuttaasut tassani meeraanerminni misileraataasimasut sinnerinik naapitsinissamut periarfissinneqarlutik.
Meeraanerminni misileraataasimasut Kulturikkut illorsuarmi Sermermiuni juulip tallimaani oqalugiaateqassapput. Illoqarfimmi innuttaasut tassunga atatillugu kaffisoriaqquneqarlutillu the-toriaqquneqarput.
Kommunip meeraanerminni misileraataasimasunik Ilulissiartitsinermut aningaasanik atuiniarnera eqqortumik pingaarnersiuinerunersoq pillugu oqallittoqarsimavoq. Borgmesterilli eqqortumik aalajangiisimallutik suli qularutiginngilaa:
Misigisimasaminnik oqaluttuarsinnaanertik nuannaarutigigaat
- Tamarmik maanngarlutik misigisimasaminnik oqaluttuariartornissamut periarfissinneqarsimanerminnik tigusilluarnerat nuannaarutigeqaara, innuttaasut taamaalillutik taamanikkut susoqarsimanera pillugu paasisaqarnerusinnaapput, Palle Jerimiassen oqarpoq.
- Ajunngitsumik ingerlassasoq isumaqarluinnarpunga. Meeraanerminni misileraataasimasut ilaasa, nunami maaniinnerminni illoqarfiit allat takorusussimavaat, namminnerlu bilitsinik pisiaqarsimallutik, borgmesteri ingerlaqqilluni oqarpoq.