Meeraallungali uteriitsuusimavunga
Inga Egedep Utoqqaat Illersuisuattut nutaatut inuiaqatigiinni utoqqarnut inuuniarnermi atugassarititaasut pitsaanerusut qulakkeerneqarnissaat sukataarutigerusuppaa. Inunnik allanik eqqunngitsumik pineqartunik misigisaqaraangami tamatigut isummani anittarpaa aalajangiussillunilu, minnerunngitsumik tusagassiortutut suliffeqarnermini.
- Anaanga oqartuaannarsimavoq, allanik isumalluuteqanngisaannassasunga.
Aviisimit AG-mit apersorneqarluni, utoqqaat illersuisortaavat Inga Egede taama oqarpoq.
Inga Egede nassuiaalluni oqaluttuarpoq, anaanaminit annermik perorsagaasimalluni. Arnaa, Helga, 42-nik ukioqarluni uillarsimavoq, uia, Erik Egede, Kujataani imaatigut ajunaarsimammat. Taamaalinerani paniat nukarleq, Inga, arfineq-marlunnik ukioqarsimavoq.
Ilaquttani politikkimik soqutigisaqartutut, inuiaqatigiinni pissutsinik tamatigut oqallisiginnittartutut, oqaluttuarai. Narsami, ataatamik savaatilittut aalisartutullu ingerlatsisuuffigisaani Landsrådimullu ilaasortaaffigisaani, najugaqarsimapput. Politikkikkut inuiaqatigiinnut tunngasunik soqutigisaqarneq meeqqanut arfinilinnut kingornussatut ingerlateqqinneqarsimavoq, ilaatigut angajullersaannut, Kajimut, 1980-ikkut naajartulerneranni naalakkersuisunut ilaasortaallunilu Inatsisartunut ilaasortaasumut.
Inga arlaannik immikkut pisaarusuleraangat, assersuutigalugu qarlinnik, nammineerluni anngaasarsiortartussaanera arnaata perorsaaneranut aamma ilaasimavoq. Taamaattumik inuusuttuaraalluni Narsami atisaarniarfimmi sulisalersimavoq, kingornalu Nuummi, taamani Hotel Grønlandiusumi erruisartutut aallartissimalluni.
- Nammineersinnaaneq ilinniarsimavara. Taamanimiillu nammineersinnaasimavunga, Inga Egede oqarpoq.
Aviisimi AG-mi Inga Egedemik apersuinermit allaaserisaq tamakkerlugu atuarsinnaavat. Aviisi uani pissarsiariuk: