Meeqqerivinnut aningaasaliissutit ikilisarneqartarsimasut
Kommuneqarfik Sermersuup meeqqeriveqarfinnut aningaasaliissutini ukiuni kingullerni ikiliallatsittarsimavai. Ulluunerani paaqqinnittarfinnut amerlanerusunik aningaasaliinissarput maanna kissaatigaarput, kommuni ilisimatitsivoq.
Kommuneqarfik Sermersooq meeqqanut ulluunerani paaqqinnittarfinnut ataatsimoortunut aningaasaliissutini ukiuni marlunni kingullerni 10 milliuunit koruuninik sipaarniarfigaa.
Illoqarfiit pingaarnersaasa kommuniata meeraaqqeriviit meeqqeriviillu katillugit 2,2 milliuunit koruuninik aamma sipaarniarfigisimavai.
Kommunip 2018-2020-mut missingersuutaanni tamanna takuneqarsinnaavoq.
Meeraaqqeriviit:
- 2018: 21,9 mio. kr.
- 2019: 20,8 mio. kr.
- 2020: 20,8 mio. kr.
Meeqqeriviit:
- 2018: 24,3 mio. kr.
- 2019: 23,2 mio. kr.
- 2020: 23,2 mio. kr.
Ulluunerani paaqqinnittarfiit ataatsimoortut:
- 2018: 84,5 mio. kr.
- 2019: 76,8 mio. kr.
- 2020: 74,3 mio. kr.
Meeqqanut atuarfeqarnermullu ingerlatsivimmi pisortaq, Lone Nukaaraq Møller Sermitsiaq.AG-mut allakkatigut akissuteqarluni nassuiaavoq meeqqerivinni sulisunik ilinniarsimasunik atorfinitsitsinissaq kommunimut ajornakusoortarsimasoq.
- Allattoqarfiup nalilerpaa piffissami tassani sulisunik atorfinitsitsiniaaneq ukiunut missingersuutinut tullerni iluarsinavianngitsoq. Taamaammat aningaasaliissutit tamakkerlugit atorneqarnavianngitsut nalilerneqarpoq, meeqqanut atuarfeqarnermullu pillugit ingerlatsivimmi pisortaq, Lone Nukaaraq Møller allakkatigut akissuteqarluni nassuiaavoq.
Amerlanerusunik aningaasaliinissaq kissaatigineqarpoq
Meeqqanut atuarfeqarnermullu ingerlatsivik ilisimatitsisoq meeqqat ulluunerani paaqqinnittarfiinut tunngatillugu ilinniarsimasunik sulisussanik atorfinitsitsiniarneq ingerlallualersimasoq.
- Ulluunerani paaqqinnittarfinni ilinniarsimasunik sulisoqalernissaq ukioq manna immikkut ukkatarisimavarput, tamannalu imminut akilerpoq. Atorfiit initaqartut siornatigut amerlanerusut neqeroorutigisinnaasimavagut, qinnuteqartullu piukkunnartut arlaqarnerulerput, Lone Nukaaraq Møller nassuiaavoq.
- Tamanna akissarsianut aningaasartuutaanerusussaammat, ulluunerani paaqqinnittarfinnut aningaasaliissutit 2021-moortut annertusinissaat kissaatigaarput.
Sermitsiaq.AG- meeqqanut atuarfeqarnermullu ataatsimiititaliami siulittaasoq oqaaseqartinniarsimagaluarpaa. Sulili uterfiginninngilaq.