Meeqqeriviit: Paarlatsinik ingerlatsiviliortoqassappat politikkikkut pingaartinneqartariaqarpoq

Meeqqeriviit pitsaanerulertinniarlugit innuttaasut siunnersuutaat Kommuneqarfik Sermersuumi nalilersorneqarsimapput. Siunnersuutit arlallit maanna atorneqareersuupput, ilaallu atulissagunik politikkikkut suliarineqaqqaartariaqarlutik.

Meeqqerivik, Soralu, Nuuk

Nuummi meeqqerivinnut immikkut atuuttussamik paarlattaasartunik ingerlatsiviliortoqassappat, tamanna politikkikkut pingaartinneqartutut isigineqartariaqarpoq.

Kommuneqarfik Sermersuumi meeqqeriveqarnermut pisortaq Ane Marie Lynge Møller Sermitsiaq.AG-mut nassuiaavoq.

Kommunimi meeqqeriveqarnerup pitsanngorsaavigineqarnissaanut innuttaasut siunnersuutaat kommunip nalilersorsimalerpai. Innuttaasut siunnersuutaanni sulisussaqarnermut tunngatillugu siunnersuutit tupaallannanngitsumik amerlanerpaapput, ukiunimi kingullerni sulisussaaleqineq ajornartorsiutaasoq maluginiarneqartarpoq.

- Politikkikkut pingaaruteqartutut isigineqartuuppat, paalattaasinnaasunik ingerlatsivimmik ingerlataqarsinnaaneq ammaffigisinnaavarput. Tamanna kommunimi misilittagaqarfigaarput, paarlattaasussat ingerlatsivimmi pigiinnarnissai ingerlakkuminaassimavoq meeqqerivimmi paarlattaasussatut inissisimasut sulilersivinneqartarmata, Ane Marie Lynge Møller Sermitsiaq.AG-mut nassuiaavoq.

Siunnersuutigineqartoq paarlatsinik ingerlatsiviliornissamut tunngassuteqarpoq. Siunnersuutigineqarluni meeqqeriviit ullormut sulisussanik naammatsinnissamut pisariaqartitaat aallaavigalugit paarlatsit ullaakkut suliartortinneqartassasut, meeqqerivinnullu aalajangersimasunut attuumasuutinneqassanatik.

Paarlatsit aalajangersimasumiinneq iluarinerusarpaat

Innuttaasut siunnersuutaasa ilaat aamma soraarninngoreersunut tunngassuteqarpoq. Tassa soraarninngoreersut sulerusuttut paarlatsitut atorneqarsinnaaneri. Immikkoortortaqarfimmi pisortaq nassuiaavoq soraarninngoreersunik ilaatigut paarlatsinik kommuni sulisitsisartoq. Taakkuli qanoq amerlatiginersut taaneqanngillat. Aammali paarlatsit suliffimmut aalajangersimasumut attuumarusuttarneri misilittakkat takutippaat.

- Massakkut atorfeqartut paarlatsigineqartullu ukiumikkut inissisimanerat assigiinngitsupilussuupput, tassa inuusuttuaqqaniit soraarnerussutissiaqalereersimasunut. Ilanngullugu eqqaarusunnarpoq paarlattaarsartut meeqqerivimmi aaliangersimasumi sulinissaq nuannarinerusaraat, meeqqat sulisullu ilisarisimareerlugit, Ane Marie Lynge Møller nassuiaavoq.

Flyvepædagoginut assinguvoq

Paarlatsinik ingerlatsivimmik pilersitsinissamut siunnersuut flyverpædagoginut assingusoq, immikkoortortaqarfiup pisortaata oqaatigaa.

Kommuneqarfik Sermersuumi kommunalbestyrelse augustip naanerani 2022-mi aalajangerpaa flyverpædagogit atorlugit misiligutaasimasoq atuutilivittussanngorlugu. Suliniut kommunimi meeqqerivinnut 26-inut tamanut atuuttussanngortinneqarpoq, 6,2 milliuunit koruuninillu akeqarluni.

- Ukioq 2022 politikkikkut aaliangiunneqarpoq immikkut ilusilersukkamik flyverpædagogimik taasamik, meeqqerivimmi sammisassaqartitsineq salliullugu sulisunullu ikorfartuutaasinnaasumik atorfinitsitsisoqassasoq, taamaaliornikkut sulisut napparsimasarnerat annikillisarneqarsinnaanerat paarlattaarsussanillu pissarsiniartarneq annikillisinneqarsinnaasorineqarpoq, Ane Marie Lynge Møller oqarpoq.

Meeqqerivinni sulisut akissarsiaat pillugit aamma siunnersuuteqartoqarsimavoq, taakkuli kattuffiup sulisitsisullu akornanni isumaqatiginninniutigineqartarmata, kommunip nammineerluni iliuuseqarfigisinnaanngilai.

Powered by Labrador CMS