Meeqqeriviit pitsaassusaat kommunip nakkutiginerussagaa
Kommune Kujallermi kommunalbestyrelse isumaqatigiittoq aalajangerpoq meeqqeriveqarneq pillugu immikkoortortaqarfiup meeqqeriviit pitsaassusaannik nalunaarusiortarnissaq pillugu suliaqartoqarnissaa misissussagaa. Tassani aningaasartassai, nalunaarusiornerlu qanoq ittuussanersoq misissorneqassallutik.
Meeqqeriviit pitsaassusermik nalunaarusiortalernissaat, tamassumunnga aningaasartuutissat allaffissornikkullu suliassat, Kommune Kujallermi meeqqeriveqarnermut aqutsisoqarfiup misissorlugu aallartippaa.
Meeqqeriviit pitsaassutsimik nalunaarusiortalernissaat pillugu siunnersuut kommunalbestyrelsemi akuerineqarsimasoq, siunnersuuteqartoq Margrethe Thårup Andersen (D) tusagassiorfinnut nalunaaruteqarluni allappoq.
- Soorunami suleqatinniit ilalerneqarnera nuannaarutigeqaara. Pitsaassutsimik nalunaarusiortalernissaq meeqqerivinni meerartatsinnut sulisorisatsinnullu qanoq atugarissaartitsiuarnissatsinnut atorluarlugulu nalilersuutigilluarsinnaassagipput qularinngilara, siger Margrethe Thårup Andersen.
Aqutsisoqarfiup misissuinera kommunalbestyrelsemi kingusinnerusukkut suliarineqassaaq.
Inatsit naapertorlugu meeqqat atuarfii ukiut tamaasa pitsaassutsimik nalunaarusiortarput. Kommunilu siullerpaavoq meeqqerivinni taama ittumik ingerlatsilernissamik aalajangertoq.
Pitsanngorsaasoqarnissaa periarfissaasoq
Margrethe Thårup Andersen isumaqarpoq meeqqerivinni pitsaassutsimik nalunaarusiortoqartalerpat meeqqanut sulisunullu atugassarititat pitsanngoriartortinnissaannut periarfissaqarnerulissasoq.
- Kommuunitsinni meeqqat atuarfianni pitsaassutsimik nalunaarusiortarnerit misilittagaqarfigilluarparput, meeqqerivinnilu aallartinnissai politikkikkut sulinitsinni pitsanngorsaajuarnissatsinnut eqqaasitsiuarnissai qularinngilluinnarpara, meeqqat, angajoqqaat meeqqerivinnilu sulisut atorluagassaannik pitsanngorsaanissamut aaliangiisarnissatsinnut atorumaarput, oqarpoq.
Aningaasaliissutissat suli inissinngitsut
Taanna nassuiaavoq Kommune Kujallermi meeqqeriveqarnermut aqutsivimmi nalunaarusiortarnissap aningaasartaqarnissaa qanorlu ingerlanneqartarnissaa misissorneqaleruttortoq. Aningaasaliinissaq, suliamillu aallartitsinissaq kommunalbestyrelsep kingusinnerusukkut naliliiffigissavaat.
- Aningaasalli atorneqartussat pitsaasumik aningaasaliinerussapput. Nalunaarusiornerit taama ittut takutissavaat meeqqat immikkut pisariaqartitsinerusut qanoq amerlanerutiginersut, taamaattumillu siusinaartumik iliuuseqarsinnaanerit aallartiaarnerusalersinnaapput, Margrethe Thårup Andersen Sermitsiaq.AG-mut oqarpoq.
Taassuma ilanngullugu nassuiaatigaa meeqqat immikkut pisariaqartitsisut, ineriartornissamulluunniit annertunerusumik tapersersorneqartariaqartut kisitsisitigut pigineqalerpata, suliniutit toqqaannarnerusut aallartinnissaannut aalajangernissaq ajornannginnerulissasoq.