Meeqqeriviit annertuumik ajornakusooqqasut

Kommuneqarfiit pingaarnersaanni meeqqeriviini perorsaanikkut naammaginartumik tunniussaqarnissamut periarfissaqarneqsulisussaaleqinikkut ajornakusooraluttuinnarpoq

Kommuneqarfik Sermersuumi Meeqqanut Atuarfeqarnermullu Ingerlatsivimmi pisortap Helene Broberg Berthelsenip kommunimi ullunuunerani neqeroorutaani killiffiup ajorluinnarnera pillugu ataatsimiitami ilaasortanut paasissutissiinissaq pisariaqarsorilersimavaa.

Akisuumik aaqqiissuteqarneq

Taassuma paasissutissiaraa, ilinniarsimasunik sulisussaaleqinermi atorfiit inuttaqanngitsut siusinnerusukkut ilinniarsimanngitsunik inuttalerneqartarsimasut.

- Taamatut aaqqiinikkut perorsaanermik inerisaaneq eqqarsaatigalugu aningaasartuutaangaatsiarpoq, taamaakkaluartoq ulluinnarni sulineq isumannaatsuutinneqarluni, taanna paasissutissiivoq.

Suliffissaaleqisulli kommunimi ikilisimanerat pissutigalugu atorfiit inuttaqanngitsut inuttalernissaat ajornakusoornerulersimasoq, taassuma paasissutissiaraa.

- Perorsaanikkut ineriartorneq pisullu ilaanni toqqissisimaneq, imminut illersorsinnaasumut qanittuararsuartut inissisimalernera Meeqqanut Atuarfeqarnermullu Ingerlatsivimmit oqaatigineqarsinnaavoq. Sulisut patajaatsut pikkorissullu meeqqerivinni taamatut atugaqartinneqartillutik suliatigut amerlasuutigut amerlavallaanik suliaqartinneqarsinnaasarput. Ilaatigut meeqqat amerlasuukkaat ataatsimoortinneqartariaqartarput, kingunerisaanillu ilaatigut nipituallaalernermik kinguneqartitsisarluni, unillatsiartarnerit sivikillisarneqartariaqartarput il.il. tamakkulu suliffiup avatangiisaanut sunniuteqarput, saqqummiussami allassimavoq.

Suliniutit iluaqutaasimanngitsut

Meeqqanut Atuarfeqarnermullu ingerlatsivimmi pisortaanerata ajornartorsiut qaangerniarlugu ukiuni kingullerni suliniutigineqarsimasut oqaatigai.

  • Atorfimmut atatillugu inissamik neqerooruteqarneq amerlanerusunik sulisunik pissarsissutigineqarsimanngilaq
  • Suliffissaaleqisunut ilinniaqqinnissamut pikkorissarnissamullu neqeroorfigineqartarput. Tamatuma kingunerisaanik sulisut ilaneqarsinnaasimanngillat. Suliffissaaleqisut akornanni ikittuinnaat suliniummut peqataajumallutik nalunaarsimapput.
  • Ingerlatsiviulli ajornartorsiut pillugu politikerinut saqqummiunneqarnissaa pillugu Ilinniartaanermut Naalakkersuisoqarfimmut saaffiginnissuteqarpoq.

Meeqqerivinni sulisut inatsit naapertorlugu amerlassusissaannik aalajangersakkap malinnissaanut, ilinniarsimasunik ilinniarsimanngitsunilluunniit naammattunik soqannginnera, unammilligassat ilagaat.

- Perorsaasunik pilertortumik amigaateqartoqareernera Nuummilu meeqqat ukiuni aggersuni amerlasuuni amerliartornissaat pissutigalugu, inatsit naapertorlugu sulisut amerlassusissaannik aalajangersagaq ukiorpassuarni aggersuni suli angujuminaannerulissaaq, pisortaq allappoq.

Danmarkimi nittarsaaneq

Helene Broberg Berthelsen paasissutissiivoq, Danmarkimi seminariani paasissutissanut atorfinitsitsinermullu nittarsaanissaq siunniunneqartoq.

- Tamanna pisariaqarsorinarpoq, sulisut amerlassusissaat naammatsinniarlugit sulisussanik naammattunik pissarsisoqarsinnaanngimmat, taamaasillunilu ulluunerani neqeroorutini perorsaanermut tunngasunik naammattunik neqerooruteqarsinnaannginneq.

Suliniutit allat aallartereersut:

  • Siunnerfeqartumik aallutaqarnikkut Nuup avataaneersunut pilerisaarineq. (ilinniarsimasut ilinniarsimanngitsullu)
  • Skandinaviami praktikkerfissanik seminariani ilinniartunut neqerooruteqarneq. Taamaalinikkut perorsaasooreersut nutaanik ilisimasaqalissapput peqataanillu pilerisaarinikkut ilinniarlutik naammasserlaat Kalaallit Nunaannut qinnuteqarusulersillugit. Praktikkernermut atatillugu angalanermut aningaasartuutinut tapit.
  • Ullup ilaani sulinissamut atorfiit angajoqqaanut ilaqutaasunullu neqeroorutigalugit.
  • Meeqqerivinni inuusuttunik (16-17-inik ukiulinnik) taartaasussanik ilinniarsimanngitsunillu atuineq.
  • Meeqqerivinni piginnaanngorsaqqittut amerliniassammata Majorissamik suleqateqarneq annertusarlugu.
Tasiilami anorersuarnissaanik aarlerisaarut

DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...

Snow Fest-imi iluatsilluartumi nutaaliorsinnaaneq nuannaarutigineqarpoq

Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...

Powered by Labrador CMS