Meeqqat unnuiffigisinnaasaat Nuummi ammarpoq
Nuummi meeqqat pisariaqartitsisut ornittagarisinnaasaat unnuiffiusinnaasoq ullumi ammarpoq.
Angerlarsimaffimmi ajornartorsiutit, toqqissisimannginneq angajoqqaalluunniit imigassamik atuivallaarnerat pissutigalugu Nuummi meeqqat ilaat unnukkut, pingaartumillu sapaatip akunnerisa naanerini illoqarfimmi aneerusaartarput. Illoqarfiilli pingaarnersaat maanna meeqqanut ornittakkamik unnuiffiusinnaasumik pilersitsivoq. Ornittakkami meeqqat nerisassaqartinneqartassapput innarfissaqarsinnaasassallutillu. Ornittagaq ullumi ammarneqassaaq, adressemi Farip Aqqutaa 10.
- Ornittakkami meeqqat qulit inissaqassapput, tassa qatserisartut inini innuttussusernut maleruaqqusaat malillugit, meeqqanut ilaqutariinnullu ingerlatsivimmi pisortaq, Martha Lund Olsen Sermitsiaq.AG-mut ilisimatitsivoq.
Taanna nassuiaavoq sanaartornissamut pilersaarutini misissorneqassasoq anginerusumik illuutiliornissaq, meeqqat amerlanerusut siunissami inissaqartinnissaat anguniarlugu.
Ornittagaq ullumi atoqqaarfissiorneqarluni ammassaaq. Ullumi nalunaaqutaq 18.00 ammaruni, sapaatip akunnerata naanera tamaat ammatinneqassaaq, aatsaallu ataasinngornermi ullaakkut nalunaaqutaq 8.00 matussalluni.
Ornittagaq ullut tamaasa nal. 18.00 ammartassaaq, ullaakkut nal. 8.00 tungaanut ammasassalluni. Sapaatip akunnerisa naanerini tallimanngornermi nal. 18.00 ammaruni, ataasinngornerup tungaanut nal. 8.00 ammasassasoq, Martha Lund Olsen ilisimatitsivoq.
Nerisaqarneq paaqqutarineqarnerlu
Ornittagaq pillugu suliniummut nassuiaammi ilisimatitsissutigineqarpoq meeqqat ilaqutariillu pillugit ingerlatsivik meeqqat amerlanerujartortut Nuummi najugaqarfiit silataanni majuartarfinni unnuisartut pillugit nalunaarutiginninnerit amerlanerujartuinnartut pisalersimagaat.
Meeqqat inuusuttullu assigiinngitsunik peqquteqarlutik angerlarusugatik najugaqarfiit silataanni tummeraqarfiit najortalersimavaat. Kommuni ornittakkamik pilersitsinermini ilaatigut meeqqat taakku pinerluttalinnginnissaannik pinaveersaartitseqataassapput.
Meeqqat aamma ilaqutariit pillugit ingerlatsivimmi pisortaq oqaluttuarpoq Nuummut nuttartut amerlanerujartortillugit aamma meeqqat isumaginninnikkut pisariaqartitsisut amerlanerujartortut. Meeqqallu illoqarfimmit allameersut angerlarsimaffimminni toqqissisimanngikkunik, illoqarfissuarmi ornitassaaleqilersarput.
- Ukiuni tulliuttuni sanaartornissamut aamma pilersaarusiornitsinnut ilannguttussaassavagut, siumut isigaluta pisariaqartitsineq aallaavigalugu ammaanissarput taamaattumik naatsortsuutigineqarsinnaassaaq, pisortaq oqarpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...