Meeqqat umiatsiaaqqami aallarussaminni orsueruttoortut
Tasiilap avannaani sinerissami ujaasisoqarnerani meeqqat inuusuttullu arfineq-marluk ippassaq nassaarineqarput. Umiatsiaaqqamik aallarussisimapput orsueruttoorsimallutilli.
Kalaallit Nunaanni Politiit Tunumi SAR-imik suliaqarneq ataasinngornermi ullup-qeqqata siornatigut aallartippaat. Tasiilap avannaani immami dunkinik qassutinillu nassaartoqarsimaneranik politiit nalunaarfigineqareersullu ujaasineq aallartinneqarpoq.
Atortut umiatsiaaqqamit Tasiilami aallarunneqarsimasutut nalunaarutigineqartumit pisuunerat paasinarsivoq. Umiatsiaaraq ullaakkut siusinnerusukkut nalunaaqutaq tallimat qeqqata missaani Tasiilap avannaani nunaqarfimmi Tiniteqilaami takuneqarsimavoq.
Tassani meeqqat inuusuttullu orsussamik tillinniarsarigaluarnerminni akornuserneqarsimapput. Inuusuttut tamatuma kingorna umiatsiaaqqamik qimaasimapput.
Kivisimanissaa ernummatigileraluaraat
- Meeqqat inuusuttullu umiatsiaaqqamik aallarsimagunarnerannik nalunaarfigineqaratta ujaasineq aallartinniarlugu aalajangerpugut, pigaartut pisortaat Julie Senderovitz Bendtsen oqaluttuarpoq.
Imaani umiatsiaaqqap qassutaanik dunkiinillu nassaartoqarmat politiit umiatsiaaqqap kivisimanissaa ernummatigileraluarpaat.
Issittumi Sakkutooqarfik timmisartumik Challengerimik ujaasinermut atugassiivoq, Tasiilamilu qulimiguulik politiinik qatserisartunillu ilaasoqartoq aamma aallartinneqarluni.
Julie Senderovitz Bendtsen oqaluttuarpoq, qulimiguulik umiatsiaaqqamik aallarussamik sumiissuserseeqqaartuusimasoq.
Qulimiguulimmit ikineqartut
- Umiatsiaaraq Tasiilap Tiniteqilaallu akornanni sinerissap killingani kisarsimavoq, minutsinilu allani ujaaseqqittoqareersorlu qulimiguulimmit inuusuttut nunamiittut nassaarineqarput – qujanartumik, pigaartut pisortaat Sermitsiaq.AG-mut oqarpoq.
Paasinarsivoq meeqqat inuusuttullu 11-nit 17-inut ukiullit arfineq-marluk pineqartut. Tamarmik ajunngillat, qulimiguulimmillu ikineqariarlutik Tasiilaliaanneqarlutik.
Politit isumaginninnermi oqartussat suleqatigalugit suliami maanna suliaqaqqipput, akuusut tamarmik 18-it inorlugit ukioqarmata, Julie Senderovitz Bendtsen paasissutissiivoq.