Meeqqat ulluat
Meeqqat ulluat Ilulissani nalliussilluassavaat
Aliikkusersuinerit, isiginnaartitsinerit nipilersornerillu atorlugit meeqqat ulluat Ilulissani arfininngornermi nalliussineqassaaq
Ilulissat timersortarfiat arfininngornermi inungasaarluassaaq. Tassanimi tamanut ammasumik meeqqat ulluat malunnartinnarneqassaaq
Meeqqanut meeqqatullu eqqarsartaasilinnut timersortarfiup matui nalunaaqutaq qulinut arfininngornermi ammarneqassapput timersortarfiullu inersua assigiinngitsunik sammisassaqartitsivittut aaqqissuunneqassaaq.
- Assigiinngitsunik atortulerluni atletikertarfimmik sanassaagut meeqqat nuannisarfigisinnaasaannik. Perorsaasunngorniat aamma meeqqanut sammisassaqartitsiniarput, kulturip illorsuanit Jonas Fleischer Sermitsiaq.AG-mut oqarpoq.
Sceneliortoqassaaq tassanngaanniillu aliikkusersuisnerit nipilersornerillu pissapput. Martin Schultz Isummani pattattutut ilisimaneqartoq nipilersussaaq taamatuttaarlu erinarsortartutut neriunaateqarluartoq Sandra Jeremiassen aamma qulingiluanik ukiulik Kaali Fleischer appisimaaqataassapput.
Isiginnaartitsineq
- Marie Mathiassen Maaliatut ilisimalluagarput ’Fulu’tut aliikkusersuiniarpoq Jens Peter Rosbach aamma ’Ani’-mik taaneqartartoq peqatigalugu. Taakkulu pisussanik aamma nalunaaruteqartartuussapput, Jonas Fleischer oqarpoq.
Kulturip illuani Sermermiuni aamma pisussaqarpoq tassa peqatigiiffik Inuit Hollywood takutitserngaassammat.
- Ilaqutariit illuata aningaasaliiffigisimavaa isiginnaartitsinermi ilitsersuisartup Laila Hansenip meeqqanik sungiusaanissaa taakkulu meeqqat ulluani takutitsiniarput, Jonas Fleischer oqarpoq.
Meeqqat ulluannik malunnartitsiniarneq sapaammi ingerlaqqissaaq Inuit Hollywoodikkut isiginnaagassiaq ’Askepot’ takutissammassuk nalunaaqutaq marlunut aamma pingasunut,.
- Ullup ataatsip ingerlanerani marloriarlugu takutinneqassaaq isiginnaartarfimmi inissat killeqarnerat pissutigalugu, Jonas Fleischer oqarpoq.
Timersortarfimmi kulturillu illuanut Sermermiunut isernerit akeqassanngillat.