Nunatsinni atuarfiit 62 meeqqat ulluanni arpatsitsinermut ColorRunimut 1. juni peqataassapput. Nakuusa aamma UNICEF ulloq eqqorlugu ikinngutigiinnerup pingaaruteqassusia oqariartuutigerusuppaat.

- Alliartornermi pitsaasumillu inuuneqarniaraanni ataatsimooqateqarnermik misigissuseq qitiusuusoq ilisimavarput. Taamaammat Meeqqat Ulluannut atatillugu meeqqat ikinngutigiilluarnerup ataatsimoorfimmullu immikkoortitsinani kikkulluunniit peqataanissaasa pingaaruteqassusaata isumaa nukittorsarniarparput, Maliina Abelsen, UNICEF Kalaallit Nunaanni suliniutinut pisortaq, nassuiaavoq.

ColorRunimi arpatsitsinermi atuaqatigiiaat peqataasut imminnut assilisinnaapput UNICEF-illu unammisitsineranut peqataallutik. Assi pitsaanerpaaq UNICEF-imit 2.500 koruuninik akissarsitinneqassaaq, klassefestimut atorneqarsinnaasunik.

Ulloq imigassartorfiussanngitsoq

Tasiilami meeqqat ulluat malunnartinniarlugu immikkut iliuuseqartoqarpoq. Illoqarfimmi imigassanik ulloq taanna niuertoqassanniglaq. Tasiilami Pilersuisoq Facebookimini taama nalunaaruteqarpoq. Imigassat niuertarfinni pisiarineqarsinnaannginneri Tasiilami kisimi iliuuserineqarpoq.

Meeqqat ulluat malunnartinniarlugu Nuummi Nuuk Centerimi nal. 11.30-16.00 sammisaqartitsisoqassaaq. Nipilersortoqassaaq, assilisittoqarsinnaassallunilu Minnie Mouse, Mickey Mouse, Olaf Nanorlu peqatigalugit. Meeqqat kiinnamikkut qalipatsissinnaassapput, kiisalu KAK aamma TAAK arsaqatigineqarsinnaajumaarlutik.

Nuummi pisussat Nuummi najukkami ataatsimiititaliap, Pisiffik, Nuuk Offsetilu aningaasaliisooqatigalugit suliarigaat, UNICEF ilisimatitsivoq.