Meeqqat ulloq unnuarlu paaqqinnittarfinnut inissinneqarneranni aningaasanik iluanaaruteqartoqarunnaassaaq
Nuummi ulloq unnuarlu paaqqinnittarfik namminersortoq maannamut iluanaaruteqartarpoq, paaqqinnittarfinnillu allanit kommunip atortagaanit qaammammut meeqqamut ataatsimut 40.000 koruuninik Kommuneqarfik Sermersuumit pissarsinerusarluni.
Meeraq ataaseq ulloq unnuarlu paaqqinnittarfimmut inissinneqarnerani akiliuteqarpallaartarneq unitsinneqassaaq.
Taamatut ilisimatitsivoq Meeqqanut Ilaqutariinnullu Ingerlatsivimmi pisortaq Martha Lund Olsen. Ingerlatsivik meeqqanut ataasiakkaanut tunngatillugu allannguivallaanngitsumik aallartittarnissaq qulakkeerniarlugu aaqqissuussilluni aallartissimavoq, tassungalu atatillugu paasineqarsimavoq, kommuni ulloq unnuarlu paaqqinnittarfinnut inissinneqarsimasunut arfineq-marluusunut akiluteqarpallaartartoq.
- Assersuutigalugu meeraq ajungitsumik ingerlasoq ulloq unnuarlu paaqqinnittarfimmut inissinneqarsimasoq, immikut ajornartorsiutillit ulloq unnuarlu paaqqinnittarfinnut matoqqasunut, sulisoqarniarnikkut piumasaqaateqarfiunerusunut inissinneqarsimasut, annertoqqataannik kommuni akiliuteqartarpoq, Martha Lund Olsen Sermitsiaq.AG-mut oqarpoq.
Qisuariartarsimanngilagut
Ingerlatsivimmi pisortap nassuiaatigaa, kommuni ulloq unnuarlu paaqqinnittarfinnut inissiisarnermini akiliuteqarpallaartalersimasoq:
- Ingerlatsivik ukiorpassuarni qisuariartarsimanngilaq, meeqqallu ataasiakkaat pisariaqartitaannik isiginninnissamut aamma ulloq unnuarlu paaqqinnittarfiit namminersortut akigititaannik misissuinissamut pisariaqartinneqartumik nukissaqarsimanngilaq. Maannali sulissisussanik amerlanerusunik atorfinitsitsisimalerpugut, allannguivallaanngitsumillu aallartittarnissamik politikkeqalernermut atatillugu aaqqissuussineq annertooq aallartsissimavarput.
Kommunimit maanna meeqqat sapinngisamik amerlasuut ilaqutariinni paaqqutarineqarsinnaasut taakkununnga nuunneqartarnissaat siunnerfigalugu sulissutigineqarpoq, tassa ulloq unnuarlu paaqqinnittarfinnut inissinneqarnissaannut sanilliullugu. Ulloq unnuarlu paaqqinnittarfinnut inissiissarnermut aningaasartuutaasartut ukiuni kingullerni millioninut marlunnik kisitsisitalinnut annertuseriarujussuarsimapput, ulloq unnuarlu paaqqinnittarfinnut inissiisarnermut aningaasartuutaasartut annikillisarniarlugit maanna tamaviaarluni sulisoqarpoq.
- Suliassaq annertoruujussuuvoq. Maannali ingerlatsivimmi suliassat taakku isumagineqarnissaanut piareersimanerulerpugut, Martha Lund Olsen erseqqissaavoq.
Qaammammut 40.000 koruuninik akiliuteqarnerusarneq
Meeqqanut Ilaqutariinnullu Ataatsimiititap kingullermik ataatsimiinneranit imaqarniliami takuneqarsinnaavoq, namminersortut ulloq unnuarlu paaqqinnittarfik Sikkersoq, ulloq unnuarlu paaqqinnittarfinnit allanit meeqqamut ataatsimut qaammammut 40.000 koruuninik akisunerusoq.
- Paaqqinnittarfimmi tassani maannakkorpiaq meeqqat arfineq-marluk inissisimasuutigaavut, taamaalilluta qaammammut 280.000 koruuninik ukiumullu 3,6 mio. koruuninik aningaasartuuteqarnerusarpugut, imaqarniliami allassimavoq, tassani aamma ilisimatitsissutigineqarpoq, meeqqat ulloq unnuarlu paaqqinnittarfinnut inissinneqarsimasut ilaqutariittut paaqqinnittartunut nuunneqarnissaannik kommunip sulissuteqarnera ”namminersortutut ulloq unnuarlu paaqqinnittarfiit akornanni aalassatsitsimasoq”.
Kommunip namminersortutut ulloq unnuarlu paaqqinnittarfinnik isumaqatigiinngissuteqarnermini eqqartuussissuserisut Malling & Co suliaqartippai.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...