Skip to main content
MIO

Meeqqat uku ilisimasaqarfiginerulissavaat

Meeqqat pillugit Siunnersuisoqatigiit meeqqat pisinnatitaaffimminnik ilisimasaqarnissaat 2015-imi sulissutiginiarpaat

Qineqqusaaleruttorfimmi Meeqqat pillugit Siunnersuisoqatigiivi ataatsimiissimapput, 2015-imilu suliassat pillugit aalajangiisimallutik. Ukiumilu tulliuttumi ”Meeqqat pisinnaatitaaffimminnik ilisimasaqarnerat” sulissutigineqassaaq. 

Taama Meeqqat pillugit Siunnersuisoqatigiit nalunaaruteqarput, taakkua aamma isumaqarput arlalitsigut Naalagaaffiit Peqatigiit Meeqqat pillugit Isumaqatigiissutaani isumaqatigiissutaasut piviusunngortissimanngikkigut.

- Kommunini aamma nuna tamakkerlugu politikkimik ingerlatsinermi meeqqat inuunerannut tunngatillugu aalajangiiniarnerni ilanngutitinneqartarnerat tusarniaavigisarnerallu pikkorluffigivallaarparput. Tamanna ilaatigut kommunit sulianik ingerlatsinerminni meeqqat ataasiakkaat inuunerannut tunngasunut aalajangiisarneranni meeqqat isumaanik tusarniaanissaminnut tamatigut naammattunik sulisussaqarneq ajortuni takusarparput, Meeqqat pillugit Siunnersuisoqatigiivi taama isumaqarput.

Taamaammat Meeqqat pisinnaatitaaffii pillugit sullissivik, MIO, ‘Meeqqat pisinnaatitaaffimminnik ilisimasaqarnerat’ qulequtaralugu 2015-imi angusassamik toraagaqarluni meeqqat Naalagaaffiit Peqatigiit Meeqqat pillugit Isumaqatigiissutaannik assigiinngisitaartukkut ilisimasaqarnerulernissaat sulissutiginiarpaa, meeqqat taamaalillutik ulluinnarni pisinnaatitaaffimmik qanoq qulakkeerneqarnissaat paasisaqarfiginerulernissaat siunertaralugu.

- Meeqqat pillugit Siunnersuisoqatigiivisa meeqqat pisinnaatitaaffiisa qulakkeerneqartalernissaannik suliaq ilisimaneqariartorneqalertussatut isigaat. Meeqqat inersimasullu meeqqat pisinnaatitaaffii pikkoriffiginerullugit ilisimasaqarfigisariaqarpaat pisinnaatitaaffiit piviusut atuutsinneri pitsaanerusumik qulakkeertalissagutsigit, Meeqqat pillugit Siunnersuisoqatigiivisa illersuisuat William Kriegel, oqarpoq.

Taamaalilluni MIO-p Naalagaaffiit Peqatigiit Meeqqat pillugit Isumaqatigiissutaat meeqqanut paasinartunngorsarniarpaa ilisimasassaannik tunioraaffiginerisigut iliuuseqartarnissamullu periarfissaqalersinnerisigut, taamaalillutik namminneq pisinnaatitaaffimmik ataqqineqalernissaat anguniarlugu sorsuutiginneqataasalerniassammata.  

Nunatta FN-mi misilitsinnginnerani missuisitsiniarput
Nunarput Naalagaaffiit Peqatigiit Meeqqat pillugit Ataatsimiititaliaannit 2016-imi nalilersorfigineqassaaq. Meeqqallu pillugit Siunnersuisoqatigiivisa qulakkeerusuppaat Naalagaaffiit Peqatigiit Meeqqat pillugit Ataatsimiititaliaata meeqqat namminneq pisinnaatitaaffimminnik ilumut qulakkeerneqartarnersut misigisartagaannik ilisimasaqalersinnissaat. 

Meeqqat pillugit Siunnersuisoqatigiit MIO-lu Meeqqat Isummersortarfiatigut 2015-imi misissuinissartik piareersarpaat, tassani misissuiffigineqarumaarpoq meeqqat qanoq pisinaatitaaffimminnik ilisimasaqartiginersut, pisinnaatitaaffitik eqqunngitsuliorfigineqartarnersutut misigisarnersut aamma taamaattoqarsimappat ilisimaneraat qanoq iliuuseqarsinnaanerlutik.  Meeqqat akissutaat Meeqqat pillugit Ataatsimiititaliaannut nassiunneqassapput. 

- Suliniutit tamakku tamarmik meeqqat pisinnaatitaaffimminnik ilisimasaqarnerannut annertusaassapput, meerartattali inuunerminni pitsaanerusunik atugaqalernissaat qulakkiissagutsigu pisariaqarpoq uagut inersimasut – ingammillu politikkerit – meeqqat pisinnaatitaaffiinik salliutitsineq ukkatarisariaqarparput, taamaaliornitsigummi meeqqat pitsaasumik ineriartornissaat ilorrisimaarnissaallu qulakkeersinnaavarput, Meeqqat pillugit Siunnersuisoqatigiivisa illersuisuat William Kriegel oqarpoq.

Meeqqat pillugit Siunnersuisoqatigiivisa meeqqat pisinnaatitaaffiisa qulakkeerniarnerat suli ajornakusoorfiusoq takusinnaavaat, qineqqusaartullu kajumissaarpaat meeqqat inuusuttullu qineqqusaarnerminni aamma politikkikkut qinigaareernermikkut suliaqarnermi eqqartuiffigalugillu sulissutigissagaat.

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER